वरिष्ठ पत्रकार भैरव रिसाल म्हिगः मन्त। वय्कः ९७ दँय् मदूगु खः। नुगःचु व सों सम्बन्धी ल्वय्या वासः याका च्वनादीम्ह वरिष्ठ पत्रकार रिसाल बानेश्वरय् च्वंगु फ्रन्टलाइन अस्पतालय् वासः याकेगु झ्वलय् मदूगु वय्कःया किजा पुरु रिसालं धयादिगु दु।

वय्कःया जन्म १९८५ साउन २९ य् ख्वपया तिथलीइ जूगु खः। वरिष्ठ पत्रकार रिसालं थ्व स्वया न्ह्यः हे थः मदये धुंका थःगु सीम्ह अध्ययनया निंतिं पाटन अस्पतालयात बिइगु घोषणा यानादीगु खः। वरिष्ठ पत्रकार रिसालं मानवअधिकार सम्बन्धी, जगदम्बा श्री व वातावरण संरक्षणसम्बन्धी थी थी सिरपा कयादीगु दु। वय्कलं रेडियो सगरमाथाय् ताःई तक ‘उहिले बाजेको पालामा’ रेडियो श्रृङ्खला सञ्चालन यानादीगु खः।

वामपन्थी विचारधारा दुम्ह रिसाल २०४८ सालया आमनिर्वाचनय् नेपाल मजदुर किसान पार्टीया पाखें ख्वपं उम्मेदवार जुयादीगु खः। वरिष्ठ पत्रकार रिसालं राष्ट्रिय समाचार समिति (रासस) य् प्रमुख समाचारदाताया भाला नापं क्वबीनादी धुंकूगु खः। ताःई निसें पत्रकारिता व समाजसेवाय् स्वानादीम्ह वरिष्ठ पत्रकार रिसालं राससय् ज्या याये न्ह्यः तथ्याङ्क विभागय् च्वनाः ज्या यानादीगु खः।

रिसालया ‘साधुलाई सुली’ (जेल डायरी), ‘लोग्नेस्वास्नी’, ‘केही मित्रका चिठी’ कृति व ‘भैरव दाइ’ लिसेंया सपूmत प्रकाशित जूगु धुकुगु दु। वय्कःया तिरिमय्जु, निम्ह काय् व निम्ह म्ह्याय्पिं दी।

Categorized in राष्ट्रिय