नेपाली कांग्रेसया सभापति शेरबहादुर देउवां येँ कांग्रेसया पूर्वसभापति तीर्थराम डङ्गोल मदुगु खबरं थःगु नुगः मछिंगु धयादीगु दु।

नेता डङ्गोल मदुगुलिं थौं शोक वक्तव्य पिकयादिसें वय्कलं “नेपाली कांग्रेस येँया पूर्वसभापति, पूर्वस्वास्थ्य राज्यमन्त्री, देय्या लोकतान्त्रिक आन्दोलनया योद्धा डङ्गोल मदुगु खबरं जि तसकं दुखित जुयाःगु दु। वय्कलं कांग्रेसया सङ्गठन निर्माण व देय्या लोकतान्त्रिक आन्दोलनय् म्हितादीगु नेतृत्वदायी भूमिका पार्टीं गबलें ल्वःबंकेफइ मखु ।”

सभापति देउवां दुःखंकःपिं छेँजःपिंत हार्दिक समवेदना प्वंकादीगु दु। नेता डङ्गोल शुक्रबाः बहनी ७७ दँय् मदुगु खः।

वय्कःया सीम्हयात थौं सुथसिया ११ः०० ता इलंनिसें हे पार्टीया केन्द्रीय ज्याकुथिइ श्रद्धाञ्जलीया निंतिं तयातःगु खः। न्हिनेसिया १ः०० ता ईतक शव अन हे तइगु कांग्रेस केन्द्रीय ज्याकुथिया मुख्यसचिव कृष्णप्रसाद पौडेलं जानकारी बियादिल।

न्हिनेसिया २ः०० ता इलय् येँया टेकु दोभानय् वय्कःयात दाहसंस्कार याइ ।सभापति देउवां नेता डङ्गोलया सीम्हय् पार्टीया ध्वाँय् फायेकाः श्रद्धाञ्जली देछानादिल।

Categorized in राष्ट्रिय