यल महानगर प्रमुखयात युरोपेली युनियनया राजदूत भेरोनिक लोरेन्जों नापलानादीगु दु। महानगरया प्रमुख चिरीबाबु महर्जन व राजदूत लोरेन्जो दथुइ म्हिगः महानगरप्रमुखया ज्याकुथिइ नापलानादीगु खः।

यलया विकास निर्माण व युरोपेली युनियननापया स्वापूया बारेय् सहलह जूगु महानगर प्रमुख महर्जनं धयादिल। “राजदूत भेरोनिक लोरेन्जोनापया खँल्हाबल्हा तसकं सौहार्दपूर्ण जुल, महानगरय् जूगु ज्याया बारे वय्कलं ध्यानबियाः खँ न्यनादिल, जिमिसं सम्पदा संरक्षण, वातावरण संरक्षण, हरियाली प्रवद्र्धनया ख्यलय् यानागु थीथी ज्याया बारे मंतया न्यनादिल, थःथवंय्या हितया बिषय तसकं ज्यालगे जूगु सहलह जुल”, वय्कलं धयादिल।

महानगर प्रमुख महर्जनं सामाजिक विकासयात महानगरं प्राथमिकताय् तयाः ज्या यानागु धयादिसें विपद् व्यवस्थापनया ख्यलय् देय्या फुक्क नगरपालिका मध्ये यलं बांलाक्क ज्या यानाच्वनागु धयादिल। युरोपेली युनियनया राजदूत लोरेन्जों महानगर प्रमुख महर्जनं महानगरया विकासय् याःगु प्रगति, दूरदर्शिता व प्रतिबद्धता च्वछायेबहःगु बिचाः तयादिल।

वय्कलं समाजय् सकारात्मक ह्यूपाया नितिं सक्रिय जुयाः ज्या यानाच्वंगु महानगरया प्रमुखनाप नापलानाः खँ ल्हायेदयाः थः तसकं लय्तानागु धयादिल।महानगरया लुमूगु पाहाँसुया नितिं सुभाय् देछासें राजदूत लोरेन्जों थनया नागरिकया हित व समग्र विकासया नितिं ग्वाहालि यायेगु प्रतिबद्धता प्वंकादिल। वय्कलं नेपाः व युरोपेली युनियन दथुया स्वापूयात क्वातुकेत ग्वाहालि यायेगु बिचाः तयादिल।

नापलायेगु झ्वलय् ‘युरोप डे २०२५’या बारे नं सहलह जूगु खः। दँय्दसं मे ८ य् युरोप डे न्यायेकी। थुगुसिइ युरोप डेया दिं यल सङ्ग्रहालय् ज्याझ्वः ग्वसाः ग्वयेगु सन्दर्भय् सहलह जूगु महानगरया प्रमुख प्रशासकीय अधिकृत रेखा दास श्रेष्ठं धयादिल।

Categorized in राष्ट्रिय