हल्चोक आकाश भैरवया झिनिदँया जात्रा
प्रेममान डंगोल | बछलाथ्व नवमी ११४५, बैसाख २३ मंगलवाः
नेपाल छगू तान्त्रिक देय् खः । थन गुलि नं द्यः दु फुक्कं धयाथें तान्त्रिक विधि विधान कथं थापना यानातःगु खः। थीथी थासय् दुगु द्यःपिनिगु मूर्ति व देगलय् थःगु हे मौलिक अस्तित्व व विशेषता दु। नेपाःया शक्तिशाली तान्त्रिक गुरुपिसं थःगु वसय् तयाः प्याखं स्यनाः द्यः प्याखं हुइकेगु यानाच्वंगु खः।
थ्वहे झ्वलय् थुगुसी जीवित द्यःया रुपय् माने याना वयाच्वंम्ह हल्चोक आकाश भैरवाय झिंनिदँया जात्रा न्ह्याःगु दु । वंगु २०८२ वैशाख १ गते राष्ट्रपति रामचन्द्र पौडेलं हल्चोक स्थित नागार्जुन नगरपालिका–३ सं राष्ट्रपतिं पूजा यानाः हल्चोक आकाश भैरवया जात्रा न्ह्याःगु दु । श्री हल्चोक आकाश भैरव झिंनिदँया जात्राय् न्हापांखुसी राष्ट्रपतिं पूजा यानाः प्रसाद ग्रहया यानादीगु खः । उकथं हे गुर्जुया पल्टनं न्हापांखुसी ब्वति काःगु खः। वैशाख २ गते श्री हल्चोक आकाश भैरव येँया नगर परिक्रम यानाः न्ह्याःगु खः। येँया न्यतय् च्वंगु ताम्सिपाखां हनुमानध्वाखाया कालभैरव न्ह्यःने पञ्चबली सहित पूजा यानाः जात्रा न्ह्याःगु खः।
दँय्दसं यँयाः पुन्हिया इलय् श्री हल्चोक आकाश भैरवया प्याखं क्यनेगु याइ। उकिइ आकाश भैरव, चण्डी व कुमारी द्यःपिं नगर परिक्रमा यायेगु याइ। तर झिंनिदँया जात्राय् धाःसा झिम्ह द्यःपिंसं ब्वति कायेगु याइ। गुकिइ श्री चण्डी, श्री कुमारी, श्री हल्चोक आकाश भैरव, श्री गंगा, श्री महादेव, श्री पार्वती, श्री आकाश देवी, श्री वाराही, श्री महाकाली व श्री दक्षिणकाली द्यःपिं दुथ्याः।
पुतुवार समुदायं न्ह्याका वयाच्वंगु श्री हल्चोक आकाश भैरव जात्राया न्हापांगु न्हिं नागार्जुनया छहारे व आकाश देवीया थासय् वनाः पूजा यायेमाःगु परम्परा दु । उगु इलय् द्यःया शक्ति भुस्याः, बाजं व चिलाख मध्ये छगूलिं दुबिइ धइगु विश्वास दु। श्री हल्चोक आकाश भैरव समाजया अध्यक्ष शेरबहादुर पुतवारया कथं स्वंगू मध्ये छगुलिं द्यःया शक्ति दुबिइ धुंकाः उकियात कापतं त्वःपुनाः द्यः छेँय् यंकेगु याइ । द्यः छेँय् विशेष पूजा जुइ । वयां लिपा झिम्ह द्यःयात हल्चोकय् चाःहिकेगु याइ।
अध्यक्ष पुतुवारया कथं थुगुसी वैशाख ३ गते केलत्वालय्, वैशाख ६ गते मरु दबुली, १२ गते दमाई त्वाः, १३ गते वतु चिकंअत, १८ गते न्यतपाच्वः, १९ गते पहिको त्वालय्, २० गते ब्रम्ह त्वालय्, २१ गते खुसिबुँइ, २५ गते बहतिइ, २७ गते न्ह्यःखाय् व वैशाख ३१ गते ताम्सिपाखा, डल्लु चकु व डल्लु चौतारय् प्याखं क्यनी । थुकथं हे सुनां नं द्यःपिंत पूजाया नितिं ब्वन धाःसा अज्याःगु थासय् नं प्याखं हुइकेगु याइ । थुकथं सःतेबलय् २५ गू पूजा तयेमाःगु चलन दु। तर पञ्चबली धाःसा ग्वसाः खलःया स्वेच्छाय् जुइ। स्वनिगलय् आकाश भैरवयात सवः द्यः वा सवः भकु नं धायेगु याः।
न्हापा न्हापा यँया पुन्हिया इलय् सवः भकुयात म्ये बिइगु चलन दुगु खः। म्ये बी न्ह्यः म्येयात अय्ला थ्वं त्वंकेगु याइ। सवः भकुयात म्ये बीगु इलय् हनुमानध्वाखाया दुने छचाखेरं पथं बार तयेगु याइ। उगु बार दुने मेपिं दुहां वनेधाःसा मदु। उगु बार दुने सवः भकु भैरव व मेम्ह छम्ह सित जक दुतछ्वइगु खः। उम्ह मनुखं अय्लाखं काःम्ह म्येयात तापाकं ह्याउँगु रुमाल क्यनाः हायेकेगु याइ। उगु इलय् म्ये नं च्वयेत वइसा हायेकाच्वंम्ह मनू बिसिउँ वनी। उगु इलय् भैरवं म्येयात पाली । तर सवः भकुं पालेगु झ्वलय् छले जुयाः म्येया थीथी ब्वय् लाइ । थुकथं ताः ई तक कुतः लिपा सवःभकु म्ये पालेत ताः लाइ।
न्हापा २०२०÷२१ साल पाखे थौंकन्हय् दशरथ रंगशालाय् सवः भकुयात म्ये बीगु ज्या जूगु खः। उगु इलय् झीगु परम्परागत नखःचखःया झ्वलय् थज्याःगु अजूचायापूगु चलन पर्यटकतय्त नं अकर्षित याये फइला धइगु आज्जु कथं रंगशालाय् म्ये बिउगु खः। थुकथं स्वदँ तक यँयाःया इलय् रंगशालाय् प्रदर्शन याःगु खः। उगु इलय् म्ये बिउगु स्वयेत सर्वसाधारण जनतां टिकट कायेमाःगु खः । तर थज्याःगु विभत्स कथं म्ये बीगु चलनयात कयाः थीथी थासं विरोध जुइवं उकियात दिकेगु ज्या जूगु खः।
श्री हल्चोक आकाश भैरवयात वायु तत्वया रुपय् नं कायेगु याः। सुयात नं वायु सम्बन्धी विकार जुल धाःसा हल्चोकय् वनाः पूजा यातधाःसा लनी धइगु विश्वास दु। श्री हल्चोक आकाश भैरवया जात्रा १०३८ दँ न्ह्यः नेपाल संवत १०७ सं तत्कालीन जुजु गुणकाम देवं न्ह्याकूगु धकाः धायेगु याः। श्री हल्चोक आकाश भैरव समाजया संरक्षक सागर पुतुवारया कथं जुजु गुणकामदेवयात महालक्ष्मीं दर्शन बिउगु खः। उगु इलय् महालक्ष्मी देवीं बिउगु उजं कथं जुजुयात शत्रुया भयपाखे मुक्त यायेगु नितिं हल्चोक आकाश भैरव सहित थीथी द्यःयात तान्त्रिक विधिं उत्पन्न यानाः स्थापना याःगु खँ देवमाला वंशावलइइ न्ह्यथनातःगु दु। उकथं हे वंशावलीइ श्री हल्चोक आकाश भैरवया झिनिदँया जात्रा धाःसा जुजु अमर मल्लं न्ह्याकूगु खँ न्ह्यथनातःगु दु।
