नेवाः देय् दबूया अध्यक्षय् प्यम्हेसिगु उम्मेदवारी
लहनान्युज | बछलाथ्व नवमी ११४५, बैसाख २३ मंगलवाः
नेवाःतय्गु राष्ट्रिय संगठन नेवाः देय् दबूया च्याक्वःगु तःमुँज्याय् जुइगु तिथि न्ह्यःने वयाच्वंगु दुसा नायः पदय् उम्मेदवार घोषणा यायेगु ज्या नं जुयाच्वंगु दु । आः तक सीदु कथं नायः पदया लागिं वर्तमान नायः पवित्र वज्राचार्य, वरिष्ठ उपाध्यक्ष चन्द्रलाल राजभण्डारी, मिसा उपाध्यक्ष रश्मिला प्रजापति व महासचिव सत्यनारायण डंगोलं उम्मेदवारी बीगु धकाः सार्वजनिक रुपं घोषणा यायेधुंकूगु दु । उम्मेदवारी बियाच्वंपिं प्यम्हं हे देय् दबूया वर्तमान कार्यसमितिया पदाधिकारीत खः ।
देय् दबूया थुगुसीया तःमुँज्याय् चुनाव मयासे सर्वसम्मत नेतृत्व ल्ययेगु लागिं जूगु कुतः ताःलाये मफयेवं प्यम्ह उम्मेदवारत मैदानय् कुहां वइगु अवस्था ब्वलंगु खः ।
आः वइगु कार्यकालया लागिं वर्तमान नायः पवित्र वज्राचार्ययात हे नायः कायम यानाः मेपिं पदाधिकारीत नं थःथःगु हे पदय् च्वनाः जिम्मेवारी काये माली धकाः देय् दबूया पुलांपिं नायःपिं लिसें सल्लाहकारतय्सं तःगू चरणय् सहलह याःगु खःसां उम्मेदवार जुइपिं सुं हे सहमत मजुइवं सकलें हे मैदानय् कुहां वंगु खः ।
वर्तमान नायः पवित्र वज्राचार्यं थःगु कार्यकालय् शुरु यानागु छुं ज्याखँत सम्पन्न यानाः मेगु छुं महत्वपूर्ण ज्या शुरु यायेगु थःगु योजना न्ह्यःने हयादीगु दु । वय्कलं नेवाः देय् दबूया छेँ छखा दनेगु थःगु योजना कार्यान्वनयया चरणय् दुगु धासें आः उकियात सम्पन्न यायेगु दायित्व नं थःगु हे जूगुलिं उम्मेदवारी बीमाःगु खँ धयादिल ।
उकथं हे वय्कलं बागमती प्रदेशय् नेपालभाषायात कामकाजीया भाषाया रुपय् कार्यान्वयन यायेगुलिं नं ज्या यायेमाःगु अवस्था दुगु धासें भाषा विधेयक कार्यान्वनय कार्यदलया थः दुजः नं जूगुलिं यानाः नं थम्हं उम्मेदवारी बीमाःगु खँ धयादीगु दु ।
लिसें वय्कलं थः देय् दबूया नायः जुइधुंकाः व्यवासायिक रुपं लिउने लानाच्वंपिं नेवाःतय्त ग्वाहालि जुइ कथं थम्ह नेपाल उद्योग वाणिज्य व चेम्बर अफ कमर्स नाप सहकार्य यानागु व उकियात पूरा यायेवं दायित्व ल्यँ दनिगुलिं नं उम्मेदवारी बीमाःगु खँ धयादिल ।
वय्कलं थःगु हे कार्यकालय् मनमोहन हस्पितलय् नेवाःतय् वासः यायेगुलिं छुटया व्यवस्था यानागु व मेगु थीथी स्वास्थ्य क्षेत्रय् नं उगु कथंया छुटया व्यवस्था याकेगु ज्या ल्यँ दनिगुलिं यानाः नं थम्हं हाकनं उम्मेदवारी बीमाःगु खँ धयादीगु दु ।
अथे हे मिसा उपाध्यक्ष रश्मिला प्रजापतिं देय् दबुली न्हापांम्ह मिसाम्ह नायः वये माःगु दावी यासें उम्मेदवारी घोषणा यानादीगु दु वय््कलं देय् दबूयात संघीय प्रणाली कथं केन्द्र, प्रदेश जिल्ला नगर जुयाः त्वाःत्वालय् तकं विस्तार जुइधुंकूगु देय् दबूयात चलायमान यायेगु नितिं थम्हं उम्मेदवारी बियागु खँ धयादीगु दु ।
वय्कलं समुदायया थीथी क्षेत्रय् मिसा नेतृत्व स्थापित यायेत थम्हं भूमिका म्हिता वयाच्वनागु खँ कनादिसें देय् दबुली न्हापांखुसी थम्हं मिसा उम्मेदवार बियागु खँ नं धयादीगु दु । वय्कलं मिसापिंत सशक्तिकरण यानाः संगठनया हितय् सदुपयोग यानाः संगठनयात रुपान्तरण यायेगु नितिं थम्हं उम्मेदवारी बियागु खँ धयादीगु दु ।
मेखे महासचिव सत्यनारायण डंगोलं देय् दबूयात ल्याय्म्ह पुस्तां न्ह्याके माःगु दावी सहित उम्मेदवारी घोषणा यानादीगु दु । वय्कलं नेवाः जातिया आर्थिक व समाजिम समृद्धिया नितिं अभियान न्ह्याकेगु । नेवाः संस्कृतिया माध्यमं आर्थिक समृद्धिया अभियान न्ह्याकेगु । देय् दयेकेगुया लिसे समाजिक उत्थानय् नेवाः जातिया योगदान व भूमिकाया ऐतिहासिक लिसे प्राज्ञिक अध्ययन यायेगु आदि खँ थःगु चुनावी प्रतिवद्धता प्वंकादीगु दु । वरिष्ठ उपाध्यक्ष चन्द्रलाल राजभण्डारीं थःगु चुनावी एजेण्डा सार्वजनिक यानादीगु मदुनि ।
नेवाः देय् दबूया च्याक्वःगु तःमुँज्या थ्वहे वइगु जेष्ठ २ निसें ४ गते तक कासासोतीइ याइगु जूगु दु।
Categorized in राष्ट्रिय
