भारतं ‘अपरेशन सिन्दूर’ नां छुनाः तःगु छगू सैन्य कारबाही कथं पाकिस्तानया गुंगू थासय् हवाई आक्रमण याःगु दु। भारतीय रक्षा मन्त्रालयया कथं, थ्व फुक्कं थासय् भारतय् जुइगु आतंकी आक्रमण तयेगु योजना व निर्देशन जुयाच्वंगु खः।

थ्व कारबाही अप्रिल २२ य् भारत–नियन्त्रित कश्मीरय् जूगु आक्रमणलिपा याःगु खः, थुकी लानाः छम्ह नेपाःमि लिसें २६ म्ह पर्यटकत सीगु खः। भारतं उगु आक्रमणया द्वपं पाकिस्तानयात ब्यूगु खः। भारतया वाशिङ्टनय् च्वंगु दूतावासं पितब्यूगु विज्ञप्तिइ धयातःगु दु, “आक्रमण पूवंकं लक्षित व सटीक जूगु खः।

म्हसिकातःगु आतंकी शिविर तय्त जक निसाना दयेकूगु खः।”पाकिस्तानी प्रधानमन्त्री शहबाज शरिफं भारतया कारबाहीयात युद्धया निंतिं घ्वायेत स्वःगु धासें कडा निन्दा यानादिल व स्याचूगु लिसः बिइगु चेतावनी बियादीगु दु। संयुक्त राष्ट्रसंघं निगूलिं पक्षयात संयम जुइत इनाप याःगु दु।

संघं धाःगु दु, “निगू आणविक शक्तित दथुइया युद्ध हलिंया निंतिं तसकं ग्यानापूगु अवस्था जुइफु।”

Categorized in अन्तर्राष्ट्रिय