उपप्रधानमन्त्री लिसें अर्थमन्त्री विष्णुप्रसाद पौडेलयात नेपाल राष्ट्र बैंकया नवनियुक्त गभर्नर डा विश्वनाथ पौडेलं नापलानादीगु दु।

थौं सुथय् अर्थ मन्त्रालय वनाः नवनियुक्त गभर्नर पौडेलं अर्थमन्त्री पौडेलनाप नापलानादीगु खः। उगु झ्वलय् अर्थमन्त्री पौडेलं नवनियुक्त गभर्नरयात बधाई बियादीसें ताःलाःगु कार्यकालया भिंतुना बियादिल। अर्थमन्त्री पौडेलं वित्त नीति व मौद्रिक नीति दथुइ समन्वय यानाः न्ह्यावनाः अर्थतन्त्र व मौद्रिक ख्यलय् खनेदूगु समस्या समाधानय् गभर्नरं महत्वपूर्ण व उपलब्धिमूलक कुतः यानादीगु भलसा प्वंकादिल।

नवनियुक्त गभर्नर पौडेलं अर्थ मन्त्रालयं देय्या अर्थतन्त्रया नेतृत्व याइगु व नेपाल राष्ट्र बैंकं मौद्रिक नीतिपाखें वित्त नीति कार्यान्वयनय् ग्वाहालि याइगु धयादिल। वय्कलं वित्तीय ख्यःया प्रभावकारिताया नितिं राष्ट्र बैंकया सुपरिवेक्षकीय क्षमताय् बः बिइगु धयादिल।

उगु झ्वलय् उद्योग, वाणिज्य लिसें आपूर्तिमन्त्री दामोदर भण्डारी, अर्थ सचिव घनश्याम उपाध्याय, राजस्व सचिव दिनेशकुमार घिमिरें नवनियुक्त गर्भनर पौडेलयात बधाई लिसें भिंतुना बियादीगु खः।

Categorized in राष्ट्रिय