परराष्ट्रमन्त्री डा आरजु राणा देउवां थःम्हेस्यां नकतिनि यानादीगु न्यान्हू यंकंया जापान भ्रमण उपलब्धिमूलक जूगु धयादीगु दु।

जापान भ्रमण पूवंकाः म्हिगः बहनी येँय् लिहांझाय् लिपा वय्कलं थःगु भ्रमणया झ्वलय् जापानया विदेशमन्त्रीलिसें थीथी महत्वपूर्ण नापलायेगु नापं नेपाः–जापान ग्वाहालि लिसें थीथी परियोजनाया बारे खँल्हाबल्हा जूगु धयादिल। उगु नापालाये ज्यात देय्या निंतिं उपलब्धिमूलक जूगु वय्कलं धयादीगु वय्कःया सचिवालयं धाःगु दु।

मन्त्री डा राणां धयादिल, “थुगु भ्रमणया झ्वलय् नेपाः जापान स्वापूया थीथी विषयया नापं नेपालय् जापानया ग्वाहालि व परियोजनाया बारेय् खँल्हाबल्हा जुल । अथेहे सम्मेलनय् जेष्ठ नागरिकपिनिगु सम्बन्धय् मेमेगु देय्तय्सं नालाकयाच्वंगु नीति, अनया अवस्था नापं व्यवस्थाया बारे नं थुइकेगु ह्वःताः चूलात।”

परराष्ट्रमन्त्री डा राणा व जापानया विदेशमन्त्री इवाया ताकेसी दथुइ थ्वहे जेठ ८ गते टोकियोय् निगूपक्षीय नापलाये ज्या जूगु खः । उगु झ्वलय् नेपाः–जापान निगू पक्षीय स्वापू, थःथवंय् हित व मंकाः चिउताया थीथी विषयस खँल्हाबल्हा जूगु वय्कलं धयादिल। अथे हे मन्त्री डा राणां वंगु जेठ ९ गते जापान इन्टरनेशनल कोअपरेसन एजेन्सी, जाइकाया नायः डातानाका अकिहिको नाप नं नापलानादीगु खः।

उगु झ्वलय् मन्त्री डा राणां नेपाःया आर्थिक, सामाजिकलिसेंया थीथी ख्यलय् वंगु ताःई निसें जाइकापाखें जापान सरकारं बियावयाच्वंगु ग्वाहालिया निंतिं सुभाय् देछानादिसें जाइकाया ग्वाहालिइ नेपालय् न्ह्यानाच्वंगु व पूवनेधुंकूगु परियोजनाया बारे खँल्हानादीगु खः।

Categorized in राजनीति