नेपाल कम्युनिष्ट पार्टी (एमालें) गणतन्त्र दिवस छगू उत्सवया कथं हने त्यंगु दु। यलया च्यासलय् च्वंगु पार्टी केन्द्रीय ज्याकुथिइ थौं च्वंगु सचिवालय बैठकं गणतन्त्र दिवसयात उत्सवया रुपं हनेगु निर्णय याःगु एमाले महासचिव शंकर पोखरेलं जानकारी बियादीगु दु।

वय्कलं न्ह्यगू दशक ताःहाकःगु त्याग संघर्षया वःगु संघीय लोकतान्त्रिक गणतन्त्रया पलिस्था जूगु दिंयात विशेष पर्वया रुपय् हनेत नं सर्वसाधारणयात आह्वान यानागु धका धयादिल। लिसें उगु महोत्सवय् सकसितं सक्रिय रुपं ब्वति कायेत नं मुँज्यां आह्वान याःगु दु। उपत्यका पिनेया पार्टी कमिटीं उगु दिं नगरस्तरय् विशेष ज्याझ्वः ग्वसाः ग्वयेगु निर्णय याःगु व उकिया निंतिं फुक्क मातहतया कमिटीयात तयारी यायेत निर्देशन बिउगु खँ पार्टीया महासचिव पोखरेलं जानकारी ब्यूगु दु।

महासचिव पोखरेलं संघीय लोकतान्त्रिक गणतन्त्र परिवर्तनया निंतिं जनताया आकांक्षायात सम्बोधन यायेगु ऐतिहासिक उपलब्धि जूगुलिं गणतन्त्रयात सशक्त व एकीकृत यायेगुलिइ पार्टीं बः बीगु धयादीगु दु।

जनताया सार्वभौमसत्ता अःखः वनीगु छुं नं गतिविधियात एमालें स्वीकार मयायेगु धासें वय्कलं गणतन्त्र जनताया सार्वभौम व्यवस्था जूगुलिं थुकियात जनताया अधिकार कथं स्थापित यायेगु ज्या जूगु स्पष्ट यानादिल।

Categorized in राजनीति