प्रधानमन्त्री केपी शर्मा ओलीयात राष्ट्रिय सतर्कता केन्द्रं थौं आर्थिक दँ २०८०÷८१ या वार्षिक प्रतिवेदन पेस याःगु दु।

प्रधानमन्त्री नापं मन्त्रिपरिषदया ज्याकुथि, सिंहदरबारय् ग्वसाः ग्वःगु ज्याझ्वलय् केन्द्रया सचिव सरजुकुमार वैद्यं प्रधानमन्त्री ओलीयात उगु प्रतिवेदन पेस यानादिल। उगु झ्वलय् प्रधानमन्त्री ओलीं सुशासन व विकासया मुख्य कार्यभार कयाः आःया सरकार दयेकूगुलिं व हे कथं प्रभावकारी ढङ्गं ज्या यायेत निर्देशन नं बियादिल।

वय्कलं प्रधानमन्त्री नापं मन्त्रिपरिषदया ज्याकुथि मातहतय् च्वंपिंसं मद्दिक ‘रिपोर्टिङ’ यायेगु व निर्देशन पालना यायेगु खँय् केन्द्र अझ सक्रिय जुइमाःगु बः बिसें विकास व सुशासनया पंगः भ्रष्टाचार जूगुलिं थुकियात नियन्त्रण यायेत स्वापू दुपिं सकल पक्षं इमानदारीपूर्वक क्वःछिनातःगु भाला पूवंकेमाःगु धयादिल।

प्रतिवेदनय् १६ क्वःगु योजनाया आज्जु कथं भ्रष्टाचार अन्त्य व सुशासन कायम यायेत केन्द्रं सार्वजनिक निकायपाखें बिइगु सेवा प्रवाह प्रभावकारी जुइकेत नियमन व अनुगमन, छड्के जाँचलिसें ज्या याना वयाच्वंगु न्ह्यथना तःगु दु।

अनुगमनया झ्वलय् छुं अनियमितता लुयावःसा केन्द्रं कारबाहीया नितिं अख्तियार दुरुपयोग अनुसन्धान आयोगय् पौ छ्वयेगु याइ।

Categorized in राष्ट्रिय