प्रधानमन्त्री केपी शर्मा ओलीं काभ्रेपलाञ्चोकया धुलिखेल नगरपालिका–६ या धुलिखेल अस्पतालया ट्रमा एण्ड इमर्जेन्सी सेन्टर भवनया थौं शिलान्यास यानादीगु दु।

नेपाल सरकारया कुतलय् धुलिखेल अस्पताल व जापान अन्तरराष्ट्रिय सहयोग एजेन्सी (जाइका) दथुइया समझदारीकथं जापान सरकारया ग्वाहालिइ सेन्टर निर्माण जुइत्यंगु खः। उगु अस्पतालय् ट्रमा एण्ड इमर्जेन्सी सेन्टर (आन्तरिक अनुदान)या सुधार परियोजनाया नितिं जापान सरकारं थप ३ अर्ब २ क्वति ९६ लख यान अनुदान बिइ।

थ्व हे जेठ २ गते अर्थ मन्त्रालयकय् उपप्रधान नापं अर्थमन्त्री विष्णुप्रसाद पौडेल व जापानया संसदीय उपविदेशमन्त्री इकुइना अकिकोदथुइ उगु अनुदान ग्वाहालि सम्झौताय् ल्हाःचिं तयेगु ज्या जूगु खः। आयोजना कार्यान्वयनया नितिं जापान सरकारं ३ अर्ब २ क्वति ९६ लख यानया अनुदान ग्वहालिइ सन् २०२३ य् ल्हाःचिं तयेधुंकूगु जूसां नं मूल्यवृद्धि व मेमेगु हुनिं आर्थिक अभाव जूगुलिं आः थप अनुदान उपलब्ध याकूगु धयातःगु दु। निर्माण सम्झौताय् जापान सरकारं ६० प्रतिशत भवनय् व दक्व कथंया मेडिकल उपकरणया नितिं ४० प्रतिशत ग्वाहालि यायेगु न्ह्यथनातःगु दु ।

सेन्टरय् पार्किङ, आइसियुु, स्वंगू अप्रेसन थिएटर, एचडियुु, ल्याब, फार्मेसी, फोहर व्यवस्थापनलिसें आवश्यक दक्व सेवात उपलब्ध जुइ।अथे हे सेन्टर सञ्चालनया नितिं स्वंगू तलाया बेसमेन्टनापं न्यागू तलाया भवन निर्माण जुइगु आयोजनाया वातावरणीय प्रभाव मूल्याङ्कन (इआइए) प्रतिवेदनय् धयातःगु दु । शिलान्यास ज्याझ्वलय् स्वास्थ्य नापं जनसङ्ख्यामन्त्री प्रदीप पौडेलया नं ब्वति दूगु खः।

Categorized in राष्ट्रिय