प्रधानमन्त्री केपी शर्मा ओलीलिसे न्युजिल्याण्डया उपप्रधानमन्त्री नापं परराष्ट्रमन्त्री विन्स्टन पिटर्सं थौं नापलानादीगु दु।

प्रधानमन्त्री निवास, बालुुवाटारय् नाप लायेगु झ्वलय् निगूपक्षीय हित, थवंथः सम्बन्ध नापं बहुपक्षीय सहकार्ययात अभिवृद्धि यायेगु विषयय् सहलह जूगु खः। वय्कःपिं दथुइ कृषि, पर्यटन, शिक्षा, व्यापार व लगानीया ख्यलय् सहकार्य यायेगुलिइ माक्व सम्भावना दु धइगु खँय् समान मत दूगु खः।

प्रधानमन्त्री ओलीं आःया सरकारं समृद्ध नेपाल, सुखी नेपाःमिया राष्ट्रिय आकाङ्क्षाया नापं स्थिरता, विकास, सुशासन, सामाजिक न्याय व सामाजिक रूपान्तरणयात प्राथमिकता बियाच्वंगु लुमंका बियादिल। उपप्रधानमन्त्री पिटर्सं नेपाःया विकास व समृद्धिया नापनापं अन्तरराष्ट्रिय दबुली निगू देय् दथुइया सहकार्य अभिवृद्धि याये माःगुलिइ बः बियादिल।

नाप लायेगु झ्वलय् परराष्ट्र मन्त्रालयया उच्चाधिकारीलिसें ब्वति दूगु खः। सन् १९५३ मे २९ य् विश्वया सर्वाेच्च शिखर सगरमाथाय् न्हापां नेपाःया तेन्जिङ नोर्गे व न्युजिल्याण्डया सर एडमण्ड हिलारीं सफल आरोहण याःगुलिं नं निगू देय् दथुइया सम्बन्ध लिक्क लाःगु खः।

Categorized in राष्ट्रिय