कासा पत्रकार हिमेशरत्न वज्राचार्यं च्वयादीगु ‘स्वर्णकथा नेपाली फुटबलको’ सफू पितब्वज्या जूगु दु। नेपाःया फुटबलया इतिहास दुथ्याःगु उगु सफू वंगु आइतवाः नांजाम्ह फुटबलया कासामि राजुकाजी शाक्यं विमोचन यानादीगु खः।

शाक्यं सन् १९८४ व १९९३ सं नेपालं दक्षिण एसियाली कासा (साग) य् स्वर्ण पदक त्याकूगु टिमय् महत्वपूण दुजः जुयादी। नेपाःया फुटबल इतिहास सछि दँ पुलां जूसां नं आः तक फुटबलया इतिहासयात कयाः सफू च्वःगु थ्व न्हापांखुसी खः। नेपालं सागय् निक्वः तक स्वर्ण पदक त्याकूगु इतिहासया विषय उगु सफुतिइ दुथ्याः।

बुकहिलं प्रकाशन याःगु उगु सफू सार्वजनिक ज्याझ्वलय् अखिल नेपाल फुटबल संघ (एन्फा) या महासचिव किरण राईं सफू ब्वनेधुंकाः न्हापा व आःया फुटबलया अन्तर थुइकेफुगु खँ धयादिल। लिसे वय्कलं पितब्वज्या जूगु सफू ब्वनेधुंकाः नेपाःया फुटबलया बारे आपालंं खँ सिकेफुगु धासें थ्व सफू पुलांपिं खेलाडीं जक मखु फुकस्यां फुटबलया इतिहास थुइकेत सफू ब्वनेमाःगु खँ धयादिल।

उकथं हे ओलम्पिक धाविका सन्तोषी श्रेष्ठं खेलकूदया अध्ययन व साहित्य नं माः धाःसा पिहां वःगु सफू शुरुवात जूगु खँ धयादिल। वय्कलं हिमेशया प्रेरणा कयाः भविष्यय् थम्हं नं कासा संस्करण च्वयेगु खँ  धयादिल। नेपाल खेलकुद पत्रकार मञ्चया अध्यक्ष निरञ्जन अधिकारीं नेपाःया खेलकुदया बारे च्वयातःगु सफू मदुगु अवस्थाय् फुटबल ययेकीपिंत थ्व सफू दस्तावेज जूगु खँ धयादिल।

उकथं हे पुलांम्ह अध्यक्ष अजय फुयाँलं नेपाःया फुटबल इतिहासयात जीवन्त ज्या याःगु धासें च्वमि वज्राचार्ययात च्वछायादिल। वरिष्ठ पत्रकार युवराज घिमिरें खेलकुदं नं देय्यात समृद्धि क्यनी धासें थज्याःगु सफू उकिया नितिं ग्वाहालि जुइगु खँ धयादिल।

Categorized in कासा