राष्ट्रपति रामचन्द्र पौडेलं इद उल अज्हा (बकर इदं) थवंथः विविधता दथुइया एकतां हे राष्ट्रिय भावनायात क्वातुकाः थवंथः भाइचारा व समानताया सन्देश च्वयेकेत ग्वाहालि याइगु भलसा प्वंकादीगु दु।

मुस्लिम समुदायया तःधंगु नखः इद दल अज्हा (बकर इद) या लसताय् थौं स्वदेश व विदेशय् च्वनादीपिं दक्व नेपाःया तताकेहेँ व दाजुकिजापिंत सुख, शान्ति व समृद्धिया नितिं भिंतुना बियादिसें उगु भलसा प्वंकादिल।

मुस्लिम समुदायं थ्व नखःया लसताय् थवंथः रिस, राग व द्वेषयात ल्वःमंकाः थवंथः खुसी, सद्भाव व भिंतुना कालबिल यायेगु व चकंगु थासय् इदगाह वा मस्जिदय् वनाः इद उल अज्हाया नमाज ब्वनेगु नापनापं थवंथः घयेपुनाः भिंतुना कालबिल यासें न्ह्यइपुक थ्व नखः न्यायेकीगु याइ ।

वय्कलं धयादीगु दु, “विश्वास, समर्पण व समाज सेवाया सन्देश बिइगु थुजाःगु नखः चखः न हलिंया थी थी थासय् च्वनाच्वंपिं नेपाःमितय् धार्मिक व सांस्कृतिक विविधता दथुइ थवंथः सद्भाव, सहिष्णुता, मेलमिलाप, एकता, भ्रातृत्व नापं सहअस्तित्वया आधारय् थःथःगु मौलिक संस्कृति व परम्पराया संरक्षण, संवद्र्धन व विकासय् तिबः बिइगु अपेक्षा यानागु दु ।”

वय्कलं इद उल अज्हा (बकर इद) या माध्यमं फुक्क नेपाःमि दथुइ राष्ट्रिय एकता, सहिष्णुता व सद्भाव दयेकाः समृद्ध व समुन्नत समाज निर्माण यायेत प्रेरणा दयेमा धकाः भिंतुना प्वंकादीगु दु।

Categorized in राष्ट्रिय