मातृभाषा पत्रकार विकासया नितिं सरकारं तिबः बीमाःगु माग
लहनान्युज | तछलागा पंचमी ११४५, असार २ सोमवाः
निक्वःगु अन्तर्राष्ट्रिय आदिवासी पत्रकार सम्मेलन न्हय्गू बुँदाया घोषणा पत्र जारी यासें तःजिक क्वचाःगु दु।
सम्मेलनया निन्हु कुन्हु थिमिइ जूगु लिपांगु न्हिंया ज्याझ्वलय् जारी याःगु घोषणा पतिइ मांभाय्या न्हापांम्ह पत्रकार धर्मादित्य धर्माचार्यया योगदानयात कदर यासें सरकारं विधिवत रुपय् सम्मान यायेगुया लिसें मान्यता बीमाःगु, राज्य समर्थन व नीतिगत प्रतिवद्धता प्वंकेमाःगु धका बिचाः तयेगु ज्या जुगु खः।
उकिया नितिं नेपाल सरकार सहित सार्क सरकारया प्रमुख तय्त मातृभाषा पत्रकारिता याइपिं पत्रकारया अधिकारया रक्षा यायेमाःगु, मातृभाषा मिडिया नीति दयेकाः लागू यायेमाःगु व मातृभाषाया पत्रकारी बजेटया व्यवस्था यायेमाःगु माग नं घोषणा पतिइ याःगु दु। संयुक्त राष्ट्र संघ, युनेस्को, अन्तर्राष्ट्रिय गैरसरकारी संस्थाय् एजेन्डाया रुपय् मातृभाषा पत्रकारित दुथ्याकेमाःगु माग नं याःगु दु। घोषणा पतिइ विश्वविद्यालय, सञ्चार सम्बद्ध संस्था व अनुसन्धान निकायय् मातृभाषा पत्रकारिताया वर्तमान अवस्था, हाथ्या व सम्भावना बारे अध्ययन यायेमाःगु व मातृभाषा पत्रकारिता याइपिं पत्रकारया संघयात मान्यता बीमाःगु व उमिगु पहुँचया निंतिं आर्थिक ग्वाहालि यायेमाःगु माग नं घोषणा पतिइ याःगु दु।
यलया प्रकृति संरक्षण कोषया हलय् जूगु उलेज्या ज्याझ्वलय् न्ववायेगु झ्वलय् मू पाहां सभामुख देवराज घिरिमें लोपोन्मुख भाय्या संरक्षण सवद्र्धन राज्य संवेदनशील जुइमाःगु खँ धयादिसें मांभाय् बल्लात धाःसा राष्ट्र बल्लाइगु खँ धयादिल । लिसे वय्कलं मांभाय् संरक्षणया नितिं राज्यं माःगु नीति दयेकेमाःगु खँ नं धयादीगु दु । नेपाःया लिपांगु जनगणना कथं १२४ स्वयां अप्वः भाषा दुगु व उकी मध्ये नं ६२ भाय् प्रचारय् वयाच्वंगु खँ न्ह्यथनादिसें मांभाय् पत्रकारितायात तिबः बीमाःगु खँ नं धयादीगु दुु । लिसे वय्कलं देय्या थीथी मांभाय्या संरक्षण, संवद्र्धन लिसे प्रचार प्रसारय् गोरखापत्र, राष्ट्रिय समाचार समिति व सार्वजनिक प्रसारण संस्थां ज्या याना वयाच्वंगुलिं वय्कलं प्रशंसा नं यानादिल।
ज्याझ्वलय् सभामुख घिमिरें मातृभाषा पत्रकारिताय् विशेष योगदान यानादीपिं वरिष्ठ पत्रकार मल्ल के. सुन्दर, गणेश राई, डा.अजितमान तामांग, महेन्द्र बिष्ट नापं राष्ट्रिय समाचार समिति व गोरखापत्रया समावेशी ल्याःया संयोजकयात सम्मान याःगु खः। सम्मानित ब्यक्तित्वतय्पाखें डा. महेन्द्र विष्टं मातृभाषां याइगु सञ्चारं मेगु भाषां स्वयां प्रभावकारी जुइगु कनादिसें आः संसदय् तकं मातृभाषां न्ववाये दुगु उपलब्धी खः धयादिल। उगु समारोह मूपाहांपाखें भाषा आयोगया दुजः माननीय सुरेश किरण मानन्धर संकलन यानादीगु २०४६ सालया आन्दोलनय् विश्वभूमिइ पिहां वःगु थीथी समाचार संकलन सफू व पत्रकार दबूया पुलांम्ह नायः सुरजबीर वज्राचार्यं च्वयादीगु धर्मादीत्य धर्माचार्यया जीवनी सफू विमोचन जूगु खः।
समारोहय् प्रेस काउन्सिलया प्रमुख अधिकृत झपेन्द्र भुषाल, निक्वःगु अन्तर्राष्ट्रिय मातृभाषा पत्रकारिता दिवसया ज्याझ्वः संयोजक सुनिल महर्जन, संस्थाया महासचिव केके मानन्धर, बंगलादेशया महम्मद अब्दुल रहमान, मैथिली भाषाया पत्रकार पुरण गुप्ता, विवेक जैनपिंसं ज्याझ्वः ताःलायेमाः धकाः भिन्तुना देछानादीगु खः। सम्मेलनया निन्हु कुन्हु मध्यपुर थिमि नगरपालिकाया मेयर सुरेन्द्र श्रेष्ठ ज्याझ्वः क्वचायेकादीगु खः। मेयर श्रेष्ठं ज्याझ्वलय् न्ववायेगु झ्वलय् मांभाय्या प्रवद्र्धनया निंतिं सम्मेलनं महत्वपूर्ण भूमिका म्हितीगु खँ कनादिल।
नेवाः पत्रकार राष्ट्रिय दब्रया अध्यक्ष नृपेन्द्रलाल श्रेष्ठया अध्यक्षताय् जूगु समापन ज्याझ्वलय् फोनिजया अध्यक्ष लक्की चौधरी, सार्क जर्नालिष्ट फोरमया अध्यक्ष राजु लामा, सम्मेलनया संयोजक सुनिल महर्जन, पत्रकार के.के मानन्धर, भारत लिसें बङ्गलादेशया पत्रकारतय्सं मांभाय्या महत्व थुकिया संरक्षण यायेमाःगु खँ धयादीगु खः।
