येँ महानगरपालिका २३ वडाया ग्वसालय् मचा साहित्यकार शान्तदास मानन्धरया लुमन्तिइ जूगु निक्वःगु चिनाखँ व च्वखँ च्वज्या धेंधेंबल्ला कासाय् ब्वति काःपिंत सिरपाः लःल्हाःगु दु।

ज्याझ्वलय् येँ महानगरपालिकाया उपप्रमुख सुनिता डंगोल मूपाहाँ कथं झायादीगु खःसा अथेहे पाहाँ कथं भाषा आयोगया दुजः सुरेशकिरण मानन्धर झायादीगु खः। उगु धेंधेंबल्ला कासाय् येँ दुनेया २३ गू ब्वनेकुथिपाखें ११२ म्ह ब्वमिपिंसं ब्वति काःगु खःसा थथे ब्वति काःपिन्त दसिपौ व नगद सिरपाः लःल्हाःगु खः।

उगु ज्याझ्वः २३ वडाया वडाध्यक्ष मचाराजा महर्जनया सभाध्यक्षताय् जूगु धेंधेंबल्ला ज्याझ्वः यायेगु नितिं नीस्वंगु समितिं बरिष्ठ साहित्यकार रमेशकाजी स्थापितया संयोजकत्वय् कवि नारद बज्राचार्य व पूर्णिमा डंगोल शाक्य दुजः दूगु निर्णायक समिति नीस्वनातःगु खः।

Categorized in राष्ट्रिय