संचार नापं सूचना प्रविधिमन्त्री पृथ्वीसुब्बा गुरुङं राष्ट्रिय समाचार समितिपाखें तामाङ भाषाया बुखँ सेवा न्ह्याकेगु प्रतिबद्धता यानादीगु दु। तामाङ पत्रकार संघं राससय् तामाङ भाषां बुखँ सेवा न्ह्याकेत माग यानाः ज्ञापनपौ लःल्हाःगु खः।

ज्ञापनपौ लःल्हाना कयादिसें मन्त्री गुरुङं राससय् तामाङ भाषाया बुखँ सेवा न्ह्याकेगु प्रतिबद्धता यानादीगु खः। वय्कलं धयादिल, “भतिचा लिबाःसां तामाङ भाषां बुखँ सेवा राससय् न्ह्याकेगु हे जुइ।”, राससं आःतक नेपाली, अङ्ग्रेजी, नेपालभाषा व मैथिली भाषापाखें बुखँ सेवा बियावयाच्वंगु खः।

संघया नायः नेत्र तामाङलिसेंया पुचलं मन्त्री गुरुङयात नापलानाः ज्ञापनपौ लःल्हाःगु खः। बागमती प्रदेश सरकारं तामाङ भाषायात बागमती प्रदेशया ज्याखँया भाषा घोषणा याःगु दच्छि दयेधुंकूगु दु। नेपाःया जनगणना २०७८ कथं नेपालय् तामाङ भाषा ल्हाइपिनिगु ल्याः १४ लख २३ द्वः स्वयां अप्वः दु।

शिक्षा, सञ्चार ख्यलय् थुकिया छ्यलाबुला पाः जुया वनाच्वंगुलिं तामाङ भाषा ल्हाइपिनिगु ल्याः नं म्हो जुयाः वनाच्वंगु दु।

Categorized in राष्ट्रिय