बंगलादेश लिसेया अपेक्षा स्वभाविक : राजदूत रहमान
लहनान्युज | तछलागा पंचमी ११४५, असार २ सोमवाः
नेवाः पत्रकार राष्ट्रिय दबुं निक्वःगु अन्तर्राष्ट्रिय मातृभाषा पत्रकारिता सम्मेलनं जारी जूगु घोषणापत्र नेपाःया निंतिं बङ्गलादेशया राजदुत मोहम्मद सफिकुर रहमानयात लःल्हाःगु दु।
बंगलादेशया राजदुतावास, बसुन्धाराय् नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठ व सार्क जर्नलिस्ट फोरमया अध्यक्ष राजु लामां मंकाः कथं राजदूत रहमानयात न्हय्गू बुँदे घोषणापत्र लःल्हाःगु खः। उगु ज्याझ्वलय् सार्क जर्नालिष्ट फोरमया महासचिव बंगलादेशया मोहम्मद अब्दुल रहमान, बंगलादेशया ञ्चारकर्मी रफिकुल इस्लाम आजाद व नेवाः पत्रकार राष्ट्रिय दबूया सहसचिव प्रजित शाक्यया उपस्थिति दुगु खः।
उगु इलय् दबूया अध्यक्ष श्रेष्ठं नेपालय् मातृभाषा पत्रकार तय्सं यानाच्वंगु गतिविधियात कयाः ध्वाथुइकादीगु खः।उकथं हे सार्क जर्नालिष्ट फोरमका अध्यक्ष लामां मातृभाषा आन्दोलनय् बंगलादेश विश्व हे न्ह्यःने लाःगु धासें दक्षिण एसियाया हे मातृभाषा पत्रकारिता विकासया निंतिं बंगलादेशं नेतृत्व यायेमाःगु खँ धयादीगु खः।
राजदूत रहमानं सार्क जर्नालिष्ट फोरम व नेवाः पत्रकार राष्ट्रिय दबुं बांलाक ज्या यानाच्वंगु धासें सुभाय् देछायादिसें मातृभाषा पत्रकारिताय् बंगलादेश लिसेया अपेक्षा अपेक्षा स्वभाविक व सकारात्मक जूगु खँ धयादिल।
Categorized in राष्ट्रिय
