बूढानीलकण्ठ नगरपालिकाय् थौं स्थानीय सरकारया सञ्चार नीतिसम्बन्धी ‘मेयरसँग पत्रकार महासङ्घ’ विषयया अन्तरक्रिया जूगु दु। नेपाल पत्रकार महासङ्घ स्वनिगः प्रदेश समितिया ग्वसालय् नापं बूढानीलकण्ठ नगरपालिकाया समन्वयकय् ग्वसाः ग्वगु उगु अन्तरक्रियाय् स्थानीय सरकारं सूचना व सञ्चारया ख्यलय् न्ह्यानाच्वंगु अभ्यासया विषय सहलह याःगु खः।

नगर प्रमुख मीठाराम अधिकारीं पत्रकार तय्सं आचारसंहिता पालना यायेमाःगुलिइ बः बियादिल। वय्कलं न्हापाया तुलनाय् आः विकास निर्माणलिसें थी थी ख्यलय् सुधार जूगु कनादिसें मिडियां बुखँ प्रसारण पिकागु इलय् न्हापा व आःया ह्यूपाःयात तुलना यानाः सकारात्मक सुचं प्रवाह यायेगु आवश्यक जू धकाः धयादिल।

नेपाल पत्रकार महासङ्घया महासचिव रामप्रसाद दाहालं सञ्चार सम्बन्धी नीति निर्माण याइबलय् संविधानया मर्म व भावना अःखः जुइ मज्यू धकाः धयादिल। नगरपालिकाया उपप्रमुख अनिता लामां मिडियां सुयातं नं देवत्वकरण मयासें सत्य सम्प्रेषण यायेमाः धकाः धयादिल।प्रेस काउन्सिल नेपाःया पूर्वकार्यवाहक अध्यक्ष गोपाल बुढाथोकीं स्थानीय सरकार पारदर्शी, सञ्चारमैत्री व विकासमैत्री जुइमाःगु आवश्यक जूगु धारणा तयादिल।

महासङ्घ उपत्यका प्रदेश समितिया अध्यक्ष टेनिस रोकां स्थानीय सरकारं नीति दयेकाः भ्रामक सुचं सचेतना सम्बन्धी ज्याझ्वः, सूचनाया हकया कार्यान्वयनलिसेंया ज्याझ्वः सञ्चालन यायेगु सुझाव बियादिल। ज्याझ्वलय् ब्वति काःपिंसं स्थानीय सरकारं मिडिया नीति दयेकाः न्ह्याःवने माःगु, स्थानीय तहया ज्याखँ पारदर्शी व सेवाग्राहीमुखी जुइमाःगु, सञ्चार नीति दयेकीबलय् स्थानीय मिडियातय्त प्राथमिकता बिइमाःगुलिसेंया सुझाः बिल।

Categorized in राष्ट्रिय