तराई–मधेश द्रुतमार्ग नेपाःया आर्थिक व सामाजिक विकासया दकलय् तःधंगु ह्यूपाः हइगु परियोजना खः।

मधेशयात स्वनिगलय् अन्नभण्डार नाप स्वाइगु अर्थय् जक काये मज्यु। थुकिं मुक्कं नेपाली अर्थतन्त्रया स्वानाः लगानीया निंतिं आपालं न्हूगु आयाम चायेके फइ सम्भावना दु। थुकिं स्वनिगलय् मेगु देय् नाप स्वापूयात याउँक स्वाकाः व्यापारय् लगानीइ बहुआयामिक लिच्वः लाकेफु।

थ्यंमथ्यं छगु दशक स्वयां अप्वः दशकनिसें निर्माणाधीन व वंगु छगू दशकनिसें चर्चाय् वयाच्वंगु थ्व रुटया प्रस्थान विन्दुइ खनेदूगु विवादं उत्साहजनक जुइ फयाच्वंगु मदु। आयोजनाया प्रस्थान विन्दु खोना क्षेत्रया जग्गा अधिग्रहण भचा जटिल जुइधुंकूगु खः। थ्व स्वयां न्ह्यः समस्या समाधान यायेगु निंतिं आपालं कुतः मजूगु मखु। २०८० बैशाख ५ गते मन्त्रिपरिषदं रक्षामन्त्रीया संयोजकत्वय् १५ म्हेसिया समिति गठन यानाः जग्गा अधिग्रहणया समस्या समाधान यायेगु धकाः मन्त्रिपरिषदं याःगु निर्णय थन उल्लेखनीय जू। खोना विवाद अझ नं क्वमचाःनि।

थ्व हे सन्दर्भय् प्रधानमन्त्री केपी शर्मा ओलीं खोना विवाद ज्यंकेत कुत यानादीगु दु। खोनाया जनतालिसे संवाद सुरु जूगु दु। थुकिं यानाः आः विवाद ज्यंनिगु सम्भावना अप्वःगु दु।प्रधानमन्त्री ओलीं येँ व तराई मधेश फास्ट टय्कया प्रस्थान विन्दुयात कयाः ब्वलंगु विवाद व थुकिया समाधानया बारे खोना व बुंगमतीया स्थानीयवासीलिसे सहलह यानादीगु दु। छुं दिं न्ह्यः थ्व हे वाःपतिइ फास्ट ट्राय्कया प्रस्थान विन्दुया विवाद समाधान मजूगुलिं ज्याय् पंगः वःगु समाचार पिहां वःगु खः।

थुकिं यानाः खोनाया जनता थः हे सक्रिय खनेदत। सहलहय् प्रधानमन्त्री ओलीं सरकारं स्थानीय जनताया क्षतिइ यायेगु सरकारया आज्जु मखु धइगु खँ स्पष्ट यानादीगु दु। फास्ट ट्रयाय्कया प्रस्थान विन्दुइ ब्वलंगु विवाद व उकिया समाधानया बारे निर्णय याये न्ह्यः प्रधानमन्त्रीं अन हे अवलोकनया निंतिं वनेगु जानकारी नं बियादीगु सकारात्मक खँ खः।

त्रिभुवन विश्वविद्यालय, पुल्चोक इन्जिनियरिङ क्याम्पसं खोकनाया जग्गा अधिग्रहणया विवाद ज्यंकेगु नितिं याःगु छगू अध्ययन प्रतिवेदनय् द्रुतमार्गया निंतिं खोना उपयुक्त प्रस्थान विन्दु जुइगु सुझाव ब्यूगु खँ सीदुगु दु। खोना विवाद ज्यंके मफुगुलिं ज्याय् पंगः वःगु दु। द्रुतमार्गया मुक्कं लम्बाइ मध्ये ६.५ किलोमिटरया ठेक्का आःतक नं जूगु मदुनि। आयोजनाया ‘प्याकेज ल्याः ११’ य् दुगु द्रुतमार्गया खोना खण्डयात न्ह्यःने यंकेगु योजना दु। ठेक्काया ज्या न्ह्याके मफुसा आयोजना इलय् क्वःमचाइगु खतरा दु। उलि जक मखु, आयोजनाया लागत नं अप्वइ, गुकिं लागत–लाभया समीकरण नं स्यंकी।

खोनाय् जातीय व सांस्कृतिक सम्पदा नष्ट मजुइफु कथं ज्या न्ह्याकेमाः। छु न योजना आदिवासी जनजातितय्गु सांस्कृतिक सम्पदा नष्ट याये मज्यु । संस्कृति नाप भाषा न स्वाइगु जूगुलि उकियात म्वाकेत थाकुइ। सरकारं खोनाया संस्कृति बचे जुइगु कथं ज्या न्ह्याकेमाः। अथे जूसा जक उगु योजना ताः लाइ।