नेपाल कम्युनिष्ट पार्टी (माओवादी केन्द्र)या नायः पुष्पकमल दाहाल ‘प्रचण्डं’ ‘भिजिट भिसा’ थौंया जक समस्या मजूगु धयादीगु दु।

प्रेस सेन्टर चितवनं थौं दाहाल निवास शिवनगरय् ग्वसाः ग्वःगु पत्रकार सम्मेलनय् वय्कलं भिजिट भिसा समस्या २०६४ सालनिसें दूगु धयादीगु खः। दाहालं धयादिल, “थ्व २०६४ सालनिसें न्ह्यानाच्वंगु दु धइगु खँ छिकपिंसं नं स्यू व जिमिसं नं सिइका च्वनाःगु दु।” थ्व विषयकय् छानबिन व नीतिगत सुधार यायेमाःगु वय्कःया धापू दु। थ्व मुद्दायात अथें त्वते मखु धकाः वय्कलं धयादिल।

थुकिया निंतिं माःसा संविधान संशोधन, ऐन निर्माण व नीतिगत निर्णय यायेमाःसां यायेगु वय्कःया धापू दु। वय्कलं धयादिल, “जिं त्वतुसां नेपाली जनतां थ्व मुद्दा त्वतेगु खँ जुइमखु।”प्रचण्डं थःपिं प्रतिपक्षय् जुसां सत्ता पक्षया थजागु भूमिका म्हिता च्वनाःगु धयादिल। वय्कलं धयादिल, “जिमिसं संविधान, ऐन कानुन व सिस्टमया निंतिं सत्तापक्षया भूमिका म्हितेमाःगु बाध्यता दु।

”नायः प्रचण्डं बजेट पारित यायेमाःगु, सङ्घीय निजामती सेवा ऐन व विद्यालय शिक्षा ऐन जारी यायेमाःगु, शान्ति प्रक्रियाया ल्यंदनीगु ज्यात पूवंकेमाःगु लिसेंया भाला वाःचायेकाः ३० न्हुया दुने छानबिन समिति दयेकेगु सर्तय् संसद्या पंगः चिइकेत सहमति यानाःगु धकाः ध्वाथुइकादिल।

Categorized in राजनीति