केन्द्रीय अनुसन्धान ब्यूरो (सिआइबीं) मितेरी बचत नापं ऋण सहकारी संस्था लिमिटेडया क्वतिक्वति ध्यबा ठगे यानाः बिस्युं वनाच्वंम्ह ज्योतिबहादुर भण्डारीयात कम्बोडियां ज्वनाः हयाः अनुसन्धानया ज्या न्ह्याकूगु दु।

प्रहरी प्रधान ज्याकुथिं वंपिं प्रहरीया टोलीं ४२ दँ दुम्ह भण्डारीयात कम्बोडियाय् ज्वनाः बुधबाः चान्हय् नेपाल हःगु खः। उगु सहकारीया सच्छि व ४४ म्ह बचतकर्ता व सञ्चालकतलिसें यानाः १४ करोड स्वयां अप्वो ध्यबा ठगे याःगु मुद्दाय् बिस्युं वनाच्वंम्ह उबलय्या महाप्रबन्धक ज्योति गुरुङपाखें उगु ध्यबा कयाः व विदेशय् सुलाच्वंगु अनुसन्धानपाखें लुया वःगु खः।

वयात ज्वनेत प्रहरीं वंगु कात्तिक १३ गते ‘रेड नोटिस’ पिकाःगु खः।मितेरी सहकारीया महाप्रबन्धक गुरुङं अपचलन याःगु करोड स्वया अप्पो ध्यबा थाइल्याण्डय् च्वनाच्वंम्ह भण्डारीं छ्यला च्वंगु व उगु ध्यबा लित कयाबी धकाः सहकारीया पदाधिकारी व भण्डारी दथुइ सम्पर्क याकूगु लुयावःगु प्रहरीं धाःगु खः।

प्रतिवादी भण्डारीं कास्की व बर्दियापाखें निगू बिस्कंबिस्कं नागरिकता कयातःगु व उगु हे लिधंसाय् निगू राहदानी नं कयातःगु लुयावःगु खः। वं मेमेपिं मनूतय्गु राहदानी नापं नागरिकताया विवरण ह्यूपाः यानाः काल्पनिक मनूतय् विवरण तयाः कीर्ते याःगु नागरिकता व राहदानीयात ठगे यायेत छ्यःगु खँ प्रहरीं धाःगु खः।

Categorized in अपराध