देया वार्षिक ५५ अर्ब रुपियाँ बराबरया ५ लाख मेट्रिक टन स्वया अप्पोे एलपी ग्यास आयात जुयाच्वंगु इलय् उकियात प्रतिस्थापन याइगु कथं थःगु हे देशय् प्राकृतिक ग्यास लूगु दु।

चाइना जिओलोजिकल सर्भेया अध्ययनं क्यगू कथं दैलेखया भैरवी गाउँपालिकास्थित जलजलेया ११२ अर्ब घनमिटर प्राकृतिक मिथेन ग्यास भण्डारण दुगु खने दुगु दु। सन् २०१९ निसे अध्ययन याना वयाच्वंगु चाइना जिओलोजिकल सर्भेया न्हापागु अध्ययनं नेपालय् ५० निसे ६० दँ तक माक्वः प्राकृतिक ग्यास दु धका क्यःगु दु।

चीनया सिएनपिसी सिबु इन्जिनियरिङ कम्पनीं २०८० वैशाख २८ गतेनिसे ड्रिलिङया निति ४ हजार १३ मिटर गाः म्हूगु खः। चिनियाँ जियोलोजिकल सर्भे कम्पनी दथुइ उत्खनन यायेत २ अर्ब ४० करोडया आर्थिक लिसे प्राविधिक ग्वहालिया सम्झौता जूगु खः। चाइना जिओलोजिकल सर्वे कम्पनीं सन् २०२५ या डिसेम्बरय् लिपागु प्रतिवेदन लःल्हायेगु  तयारी याना च्वंगु दु।

सङ्घीय सरकारं पेट्रोलियम पदार्थया अन्वेषणया ज्या न्ह्याकेगु निति ४५ रोपनी जग्गा अधिग्रहण यायेगु निति स्वीकृति बिइ धुकुगु दु।

Categorized in राष्ट्रिय