बागमती प्रदेश संस्कृति लिसें पर्यटन मन्त्रालयया ग्वाहालि व सभ्यता नेपाः नापं आनन्द भुवन विहारया ग्वसालय् न्ह्याःगु स्वीन्हुया पालि भाषा प्रशिक्षण ज्याझ्वः क्वचागु दु।

ग्वसाः खलःया कथं पालि भाषा सम्बन्धी थ्व प्रशिक्षण देय्या हे न्हापांगु ख । प्रशिक्षण ज्याझ्वलय् ६० म्हेस्यां ब्वति काःगु खः। मागधी भाषा न धाइगु पालि भासं भगवान् बुद्धं तत्कालीन समाजयात उपदेश बियादीगु विश्वास यानातःगु दु।

बुद्धं थः शिष्य भिक्षुपिंत न्ह्यागुं नगर बाय् गामय् वंसां फयांफच्छि जनभाषां उपदेश बिइत निर्देशन बियादी। प्रशिक्षणया झ्वलय् प्रशिक्षार्थीपिंत परित्राणया मूल पालिया अर्थानुवाद, धम्मपदया मूल पालिया अर्थानुवाद, पालि भाषा व व्याकरण, पालि साहित्यया इतिहास व ग्रन्थबारे स्यनेकने यायेगु ज्या जूगु खः। प्रशिक्षण क्वचागु लसताय् म्हिग थन जूगु छगू ज्याझ्वलय् संस्कृति लिसें पर्यटन मन्त्रालयया सचिव दीपेन्द्र सुवेदीं प्रशिक्षार्थीपिंत दसिपौ लःल्हानादिल।

वय्कलं बुद्ध शिक्षाया जिज्ञासुपिंसंं पालि भाषाया प्रशिक्षण तसकं रुचि तःगु थःम्हेस्यां तायेकाःगु धयादिसें वय्कलं बागमती प्रदेश दुने तसकं म्हो जक छ्यलाबुला दूगु व सीमान्तकृत भाषातय् प्रवद्र्धनया निंतिं बागमती प्रदेश सरकारं बजेट फ्याःगु धयादिल। प्रशिक्षक डा त्रिरत्न मानन्धरं प्रशिक्षार्थीपिनिगु नियमित उपस्थिति व अभिरुचि ग्वसाः खलःयात हःपाः जूगु धयादिल।

आनन्दभुवन विहारया प्रमुख लिसें प्रशिक्षण ज्याझ्वः कजि भिक्षु शान्त शोभनया सभापतित्वय् जूगु उगु समापन ज्याझ्वलय् सभ्यता नेपाःया नायः रमेशकाजी स्थापितं बौद्ध साहित्य भण्डारयात दुवाला स्वये मंदुपिनिगु निंतिं थुजाःगु भाषा प्रशिक्षण नियमित कथं न्ह्याकेमाःगु खँय् बः बियादिल।प्रशिक्षार्थीपाखे मोहिनी चित्रकार व भक्त बहादुर शाक्यं थःथःगु अनुभव न्यकाःदीगुु खः।

ग्वसाः खलः पाखे संस्कृति व पर्यटन मन्त्रालययात ग्वाहालिया निंतिं कृतज्ञता प्वंकुसे छपू पौ लःल्हायेगु ज्या नं जूगु खः।

Categorized in राष्ट्रिय