प्रधानमन्त्री केपी शर्मा ओलीलिसे निर्वाचन आयोगं प्रतिनिधिसभा व प्रदेशसभाया खाली जुयाच्वंगु निगू थाय्, राष्ट्रियसभाय् वइगु फागुन २० गते खाली जुइगु १८ गू थाय् लिसें स्थानीय तहया खालिगु थासय् निर्वाचन यायेगु सन्दर्भय् थौं परामर्श याःगु दु।

प्रधानमन्त्री नापं मन्त्रिपरिषदया ज्याकुथि, सिंहदरबारय् प्रधानमन्त्री ओलीयात आयोगया कार्यवाहक प्रमुख निर्वाचन आयुक्त रामप्रसाद भण्डारीलिसें आयुक्त तय्सं नापलाना वइगु कात्तिकया निगूगु वालय् प्रतिनिधिसभा व प्रदेशसभाया उपनिर्वाचन यायेत व राष्ट्रियसभाय् वइगु फागुन २० गते खाली जुइगु १८ गू थाय् नितिं निर्वाचन क्वःछीगु विषय सहलह याःगु खः।

प्रतिनिधिसभाया दुजःया रुपन्देही लागा ल्याः ३ व गण्डकी प्रदेशसभाया मनाङ लागा ल्याः १ (२) या खाली जुया च्वंगु दुजः पदया नितिं कात्तिकया निगूगु वालय् निर्वाचन यायेगु कथं नेपाल सरकारया परामर्शय् थ्व हे असार १६ गते दुने आयोगं मिति क्वःछीगु तयारी याःगु खः। अथे हे स्थानीय तहय् १३ म्ह वडा अध्यक्षया पद खाली जुयाच्वंगु आयोगं अवगत याकूगु दु।

प्रधानमन्त्री ओलीं निर्वाचनया नितिं आयोगं याःगु तयारीकथं आवश्यक सहजीकरण यायेत नेपाल सरकारपाखें ग्वाहालि दइगु भलसा बियादिल। वय्कलं वइगु आवधिक निर्वाचनया नितिं यायेमाःगु तयारी नं यानाच्वनेत आयोगयात सुझाः बियादिल। नाप लायेगु झ्वलय् आयुक्तपि डा जानकीकुमारी तुलाधर व सगुनशमशेर जबरा, प्रधानमन्त्री नापं मन्त्रिपरिषद्या ज्याकुथिया उच्चाधिकारीलिसेंया ब्वति दूगु खः।

Categorized in राष्ट्रिय