आदिवासी जनजाति चलचित्र महासंघया ग्वसालय् स्वन्हु यंकं जूगु न्याक्वःगु नेपाल आदिवासी जनजाति चलचित्र महोत्सवय् नेवाः समुदायया “स्रिंकिंग सिभिलाइजेशन अफ काठमाडौं भ्यालि” डकुमेन्ट्रीं सर्वोत्कृष्ट डकुमेन्ट्री सिरपाः त्याकूगु दु।

थ्व डकुमेन्ट्रीया च्वमि, परिकल्पनाकार व निर्देशक ओम चरण अमात्य खःसा सह निर्देशक व किपालुमि लुजः सिंह खः। थ्व महोत्सवय् मगर समुदायया “खिल” यात सर्वोत्कृष्ट शर्टफिल्म सिरपाः ब्यूगु दु । असार ६ गतेनिसें न्ह्यानाः आइतवाः क्वचाःगु महोत्सवय् लिम्बु भाषाया “चे” सर्वोत्कृष्ट चलचित्र व सर्वोत्कृष्ट निर्देशकया सिरपाः त्याकेत ताःलाःगु खः।

थ्व फिल्मया निर्देशक सागर केरुङ खः। अथेहेतुं मगर भाषाया “ट्याङ्गचलाक” या च्वमि मेक बहादुर पुन मेजनयात सर्वोत्कृष्ट पटकथाकार व गुरुङ्ग भाषाया “मि थों”या राज बहादुर गुरुङ्ग राजेशयात सर्वोत्कृष्ट छायाङ्कन सिरपाः बिउगु खः।

सञ्चार लिसे सूचना प्रविधिमन्त्री पृथ्वी सुब्बा गुरुङ्ग मूपाहाँ कथं झायादीगु उगु ज्याझ्वलय् आदिवासी जनजाति भाषाया फिल्म यात्रा शुरु याःगु नेवाः भाषाया फिल्म खः तर आः वया नेवाः फिल्म मेमेगु आदिवासी जनजाति मातृभाषी फिल्मसिबें लिउने लानाच्वंगु खँ न्यना दुःख ताल धकाः धयादिलसा नेवाः फिल्मकःमि तयेत फिल्म दुने आदिवासी पहिचान ल्ह्वनेत व फिल्म ख्यःया नापनापं भाषिक ख्यः च्वन्ह्याकेत इनाप यानादिल।

वयकलं राष्ट्रियसभाय् पेस जूगु “चलचित्र नीति” छलफलया क्रमय् दूगु व आदिवासी जनजाति चलचित्र प्रवद्र्धन यायेत माक्वः प्रावधान मदु धाःगु न्यना उकि आवश्यक पक्ष दुथ्याकेगु प्रतिबद्धता प्वंकादिल। उगु ज्याझ्वलय् नेपाःया संकिपा पत्रकारिता ख्यलय् ज्वःमदुगु योगदान यानादीम्ह महासंघया संस्थापक उपाध्यक्ष विजयरत्न तुलाधर असंबरेयात महासंघपाखें विशेष सम्मान नं देछाःगु खः। महोत्सवया निर्णायकय् पत्रकार विजयरत्न तुलाधर, न्हापाम्ह मिसा छायाँकार शबनम मुखिया व तामाङ्ग फिल्मया निर्देशक हिरालाल ब्लोन च्वनादीगु खः।

ग्वसाः खलःपाखें महासंघया कार्यवाहक नायः भुइसाल लामाया अध्यक्षताय् जूगु समापन समारोहय् महोत्सव निर्देशक प्रतिमाया पुन मगर, महासंघया पुलांम्ह नायः अमृत सुनवार, पुलांम्ह सांसद रिता माझी, निर्णायक विजयरत्न तुलाधरपिन्सं नुगःखँ तयादीगु खः।

Categorized in मनोरन्जन