प्रधानमन्त्री केपी शर्मा ओलीया आह्वानय् थौं जूगु सत्तापक्षीय राजानीतिक दलया बैठकं नेपाल सरकारं सङ्घीय संसदय् न्ह्यब्वःगु विनियोजन विधेयक, २०८२ पारित याकेगु क्वःछ्यूगु दु।

प्रधानमन्त्री निवास, बालुुवाटारय् थौं जूगु शीर्ष नेता तय्गु बैठकं थौंया प्रतिनिधिसभाया बैठकय् बजेटबारे थंगु सहलहय् प्रधानमन्त्रीलिसें सम्बन्धित मन्त्रीतय्सं थौं लिसः व स्पष्टीकरण बिइ धुंकाः क्वःछीत न्ह्यब्वइगु ज्या धलः दूगुलिं थःपिनि सांसदतय्त बजेटया पक्षय् मत बिइकेगु क्वःछ्यूगु खः।

सत्तापक्षीय दलया बैठकय् ब्वति काःपिं तराई मधेश लोकतान्त्रिक पार्टीया नायः महन्थ ठाकुरं बजेटय् प्रस्तावित ‘टेक एन्ड पे’या विषय प्रमुुख दल नेपाल कम्युनिष्ट पार्टी (एमाले) व नेपाली कांग्रेस दथुइ समझदारी जुइ धुंकूगुलिं बजेट पारित याकेगु विषय सहलह जूगु जानकारी बियादिल।

Categorized in राजनीति