सञ्चार नापं सूचना प्रविधिमन्त्री पृथ्वी सुब्बा गुरुङं हुलाक सेवायात विश्वसनीय, भरपरे जूगु व दु्रत यायेफःसा राजस्व अप्वयेके फइगु धारणा प्वंकादीगु दु।

हुलाक सेवा विभागं थौं थन ग्वसाः ग्वःगु आर्थिक दँ २०८१÷८२ या प्रगति समीक्षासम्बन्धी अन्तरक्रियाय् मन्त्री गुरुङं आधुनिक व स्मार्ट हुलाक दयेकेत न्हूगु ऐनया आवश्यकता क्यनादिल। “हुलाकयात आधुनिक दयेकेत मन्त्रालयं सक्रिय जुयाः ज्या यानाच्वंगु दु, आधुनिक हुलाक निर्माणया नितिं नीति निर्माण अन्तिम चरणय् थ्यंगु दु”, वय्कलं धयादिल।

वय्कलं कर्मचारीतय् क्षमता वृद्धि यायेगुलिइ नं सुझाः बियादिल। “झीसं थुगुसी हे हुलाक ऐन हयेगु जुइ, स्थानीय हुलाक संरचनायात अझ नं प्रभावकारी दयेकेगु योजना ज्वनाः ज्या जुयाच्वंगु दु, थुकिया नितिं कर्मचारी तय्गु माक्व ग्वाहालि व साथ दयेमाः”, वय्कलं धयादिल। मन्त्री गुरुङं थुगुसी हे स्थानीय तहया हुलाक ज्याकुथिइ म्ह्वतिं नं छगः मोटरबाइक उपलब्ध याकेगु नं न्ह्यथनादिल।

आः वइगु आर्थिक दँ २०८२÷८३ या बजेट हुलाकया नितिं माक्व बजेट विनियोजन मजूसां नं आवश्यकताया आधारय् बजेट थपे यायेत व मेमेगु स्रोत मुंकेत थःम्हं फक्व कुतः याना च्वनागु दु धइगु वय्कःया धापू खः। ज्याझ्वलय् मन्त्रालयया सह–सचिव कोशहरि निरौलां मन्त्रालय हुलाक सेवाया वृद्धि व विकासया नितिं न्ह्याबलें सकारात्मक जूगु कनादिसें हुलाकयात इकर्मशय् स्वायेगु कुतः जुयाच्वंगु धयादिल।

हुलाक विभागया महानिर्देशक मनमाया भट्टराई पंगेनीं हुलाक सेवायात जनताया छेँखापतिकं थ्यंकेत स्थानीय तहलिसे सहकार्य यानावयाच्वंगु खँ कनादिल।

Categorized in राष्ट्रिय