नेपाःया संविधानं प्रत्येक नेपाःमि नागरिकया मौलिक हक कथं आधारभूत स्वास्थ्य सेवा स्थापित याःगु दु। संविधानं स्वास्थ्य सेवाया नापनापं मेमेगु आपालं क्षेत्रय् मौलिक हकया व्यवस्था यानातःगु दु। संघीय लोकतान्त्रिक गणतान्त्रिक अभ्यासया थ्व दशकय् संविधानं प्रत्याभूति यानातःगु फुक्क मौलिक हक समान रुपं कार्यान्वयन जुइ फयाच्वंगु मदु।

ग्यारेन्टी यानातःगु मौलिक हकयात कार्यान्वयन यायेत पर्याप्त स्रोत व संरचना दयेमाः। सीमित स्रोत व संरचनां फुक्क मौलिक हकयात समान रुपं कार्यान्वयन याये फयाच्वंगु मदु। गुलिखे लागाय् मौलिक हकया कार्यान्वयनय् आशाजनक रुपं गति काःगु दु। उकी मध्ये स्वास्थ्य क्षेत्रय् नागरिकं कायेमाःगु मौलिक हकया कार्यान्वयनय् गति वयाच्वंगु दु। उलि जक मखु वंगु छगू दशकय् देय्या स्वास्थ्य पूर्वाधारय् धिसिलाःगु प्रगति जूगु दु। छगू इलय् छुं जटिल ल्वय्या निंतिं जक मखु, सामान्य ल्वय्या निंतिं नं विदेश वनेमाःगु बाध्यता दुगु खः। आर्थिक क्षमता दुपिं तकं भारत, थाइल्याण्ड वनेगु याः।

नेपालय् उपचारया व्यवस्था मदुगुलिं ध्यबा दुपि विदेश वनेगु बाहेक मेगु विकल्प मदुसा ध्यबापिं थःगु ल्वय् नाप म्वायेमाल। आः वयाः थीथी ल्वय्या निंतिं विदेश वनेमाःगु बाध्यता मन्त। उलि जक मखु विदेशीत नं वासः यायेगु नितिं नेपालय् वयेगु सुरु जूगु दु। नेपाः स्वास्थ्य पर्यटनया सम्भावना दुगु देय् जुयाच्वंगु दु। स्वास्थ्य क्षेत्रय् जूगु सुधारया कारणं हे थुज्वःगु प्रगति सम्भव जूगु खः।सरकारं ग्वाहालिया वातावरण नं दयेकूगु दु। नुगःचुया उपचार बांलाना वल। सरकारी व निजी क्षेत्रपाखें नुगःचुया वासः व शल्यक्रियाय् बांलाःगु प्रगति जूगु दु। नेपालय् नं लिभर ट्रान्सप्लान्ट जुइगु शुरु जूगु दु।

बांलाःगु पूर्वाधारया लिसें मिखा व वाया उपचारय् नं सेवा विस्तार जूगु दु। मिखाया उपचारय् नेपालं हलिमय् नां जायाच्वंगु दु। वाया उपचार दंगु व अप्वः भरोसा याये बहःगु जुयाच्वंगु दु। थुपिं लागाय् नेपाःमितय्त वासः यायेगु सुविधा दयेधुंकूगु दु, अले विदेशय् च्वनाच्वंपिं नेपाःमि व विदेशी नागरिकत नं वासः यायेगु नितिं नेपाः वयेगु शुरु जूगु दु। जलास्यें प्रत्यारोपण याये न्ह्यः डायलासिसया तसकं महत्व दु। थ्व सेवा नं व्यापक जुयावंगु दु। सरकारं नं आर्थिक ग्वाहालि यानाच्वंगु दु। ख्वपय् च्वंगु शहिद धर्मभक्त राष्ट्रिय प्रत्यारोपण केन्द्रं मिर्गौला व कलेजो प्रत्यारोपणय् बांलाःगु सफलता चूलाकाच्वंगु दु। थज्याःगु दसुत यक्व दु।

छुं स्वास्थ्य सेवाया नितिं भारत व बंगलादेशं नं विरामी नेपाः वयेगु सुरु जूगु सकारात्मक पक्ष खः। मिखाया उपचारय् आकर्षणय् तःधंगु वृद्धि जूगु दु।क्षेत्रया ल्याखं नेपालय् छगू दशक न्ह्यः तक मिर्गौला प्रत्यारोपण सम्भव मजूगु खः। आः प्रत्यारोपणया नितिं विदेशय् वने म्वाल। क्यान्सरया उपचार झन हे जटिल जुल। नेपालय् छुं हे पूर्वाधार मदुगु खः। नेपालय् क्यान्सरया उपचार सम्भव जुजुं वनाच्वंगु दु।