सरकारं लागुऔषध नियन्त्रणया निंतिं ब्यागलं विभाग नीस्वने त्यंगु दु। लागुऔषध दुरुपयोग लिसें अवैध ओसारपसार विरुद्धया अन्तरराष्ट्रिय दिवसया लसताय् थन थौं ग्वसाः ग्वःगु ज्याझ्वलय् धाः कथं आः वइगु दँय् विभाग नीस्वने त्यंगु दु।

उगु ज्याझ्वलय् गृहमन्त्री रमेश लेखकं लागु औषध नियन्त्रणया निंतिं आः वइगु दँय् ब्यागलं विभाग नीस्वने त्यनाःगु धयादीगु दु। वय्कलं लागु औषध नियन्त्रण सरकारया उच्च प्राथमिकताय् लाःगु धयादिल। “जिमिसं लागुऔषध नियन्त्रण यायेगु निंतिं आः वइगु आर्थिक दँय् गृह मन्त्रालय अन्तर्गत लागुऔषध नियन्त्रण विभाग नीस्वनेत्यनागु दु।”

गृहमन्त्री लेखकं धयादिल, “गृह मन्त्रालयं लागु औषध नियन्त्रणया निंतिं सचेतना मूलक ज्याझ्वः, रोकथाम व सजायलिसेंया ज्याझ्वः न्ह्याकागु दु।” वय्कलं लाग ुऔषध सेवन दुव्र्यसनया हुनिं सतक दुर्घटना, आत्महत्या, साइबर क्राइम लिसेंया घटना जुइगु याना च्वंगु धयादिल । “मुख्य विषय धइगु थुकिया रोकथाम खः। जनचेतना महत्वपूर्ण विषय खः। लागु औषधया दुरुपयोगं समाजयात भयावह कथं लिच्वः लाकाःच्वंगु दु।” गृहमन्त्री लेखकं धयादिल, “लागु औषध नियन्त्रणया निंतिं समाज, छेँ, त्वा व ब्वनेकुथि तक थ्यंकाः सचेतना मूलक ज्याझ्वः यायेमाःगु खनेदु।”

लागुऔषध नियन्त्रणया अभियानय् ग्वाहालिया निंतिं इनाप यासें मन्त्री लेखकं सरकारया कुतलं जक नियन्त्रण याये थाकू धयादिल। “छगू लख ३४ द्वः लागुऔषध सेवनकर्तात दूगु तथ्याङ्क दु। समाजय् बांमलाक्क लिच्वः लानाःच्वंगु दु।” वय्कलं धयादिल, “देय्न्यंकंया कारागारया कैदीबन्दीत मध्यय् निगूगु तःधंगु ल्याखय् लागुऔषध दुव्र्यसन, ओसारपसार, भण्डार याइपिं दु।

थुकिं थुकिया अवस्था ध्वाथुइकी।” दिवसया लसताय् ग्वसाः ग्वःगु ज्याझ्वलय् गृहमन्त्रालयया सचिव गोकर्णमणि दुवाडी, प्रहरी महानिरीक्षक दीपक थापा, राष्ट्रिय अनुसन्धान विभागया प्रमुख हुतराज थापा व थीथी सरोकारवाला निकाय, सरकारी लिसें गैरसरकारी सस्थाया प्रतिनिधितय्सं ब्वतिकाःगु दु।

Categorized in राष्ट्रिय