भारतया लोकंह्वाःगु टिभी रियालिटी शो ‘बिग बोस १३’य् नांजाःम्ह अभिनेत्री, मोडल व म्येहालामि शेफाली जरिवाला मन्त। भारतीय सञ्चारमाध्यमया कथं शेफाली शुक्रवाः बहनी ४२ दँया उमेरय् हृदयघात जुयाः मदुगु खः।

वयागु स्वास्थ्य बांमलाना वने धुंकाः वया भाःत अभिनेता पराग त्यागीं शेफालीयात अस्पताल यंकूगु खःसा अन हे शेफालीयात सीगु घोषणा याःगु खः। सुथय् १२ः३० ता इलय् वयागु सीम्ह पोष्टमार्टमया निंतिं कूपर अस्पताल यंकूगु खः। अथेहे, अनुसन्धानया नितिं मुम्बई प्रहरी लिबाक्क बहनी अन्धेरीइ च्वंगु शेफालीया छेँय् थ्यंकूगु खः।

घटनास्थलय् फोरेनसिक पुचः नं उपस्थित जूगु खः। छेँ दुने शंकास्पद सामान मालेगु ज्या जूगु खः। वय्कःया मृत्युया परिस्थितियात कयाः आःतक छुं आधिकारिक विज्ञप्ति पिहां मवःसां प्रहरी व फोरेनसिक पुचःया उपस्थितिं धाःसा थुगु मुद्दायात शंकास्पद रुपं कायेगु यानाच्वंगु संकेत बियाच्वंगु दु। शेफालीं निक्वःतक इहिपा याये धुंकूगु दु।

सन् २००४ य् मीट ब्रदर्सया संगीतकार हरमीत सिंहलिसे न्हापांगु इहिपा जूगु खः, तर सन् २००९ य् इमिगु पारपाचुके जूगु खःसा अनंलि सन् २०१५ य् शेफालीं अभिनेता पराग त्यागीलिसे इहिपा याःगु खः।

Categorized in मनोरन्जन