राष्ट्रिय समाचार समिति (रासस)पाखें प्रवाह जुयाच्वंगु नेपाल भाषा बुखँ सेवाबारेया आवधिक समीक्षा बैठक थौं क्वचाल। राससं २०८१ साल कात्तिक ४ गतेनिसें मैथिली व नेपाल भाषां बुखँ बुलेटिन प्रकाशन न्ह्याकूगु खः।

राससं थ्व स्वया न्ह्यः अवधी भाषं नं बुखँ बुलेटिन पिकाया वयाच्वंगु खः। उगु इलय् सञ्चार नापं सूचना प्रविधि मन्त्री रेखा शर्मां २०८० साल पुस २३ गते रासस केन्द्रीय ज्याकुथि, भद्रकाली प्लाजाय् छगू ज्याझ्वः दथुइ मांभाय्या बुखँ सेवाया उलेज्या यानादीगु खः।

उगु बैठकय् नेपाल भाषां पत्रकारिता याना वयाच्वंगु थी थी सञ्चार माध्यम नापं प्रकाशन गृहं प्रतिनिधित्व याइपिं भाषा अभियन्ता नापं सञ्चारकःमि तय्गु ब्वति दूगु खः। वय्कःपिंसं राससं मांभाषं बुखँ बुलेटिन पिकाःगु च्वछायेबहगु ज्या जूगु धासें स्थानीय समुदायलिसे स्वाना च्वंगु ज्याखँ तय्गु बुखँ अपेक्षाकृत जुइक म्हो जूगुपाखे रासस व्यवस्थापनयात ध्यान आकृष्ट यानादिल। मांभाय्या बुखँ बुलेटिनय् नं राज्य पक्षया हे जक बुखँ प्रवाहित जूगु अनुभूति थःपिंत जूगु वय्कःपिनिगु धापू खः।

मांभाय्या बुखँ सेवा न्ह्याकेधुंकाः आः थुकियात अझ सुधार यानाः प्रभावकारी व व्यापक यानाः यंकेमाःगु आवश्यकताय् बः बिसें वय्कःपिंसं फयाफक्व अप्वः स्थानीय ज्याखँतय्त रासस बुखँ बुलेटिनय् थाय् बिइकेत बुखँ संकलन व सम्प्रेषणय् थःपिनिगु न दायित्वबोध जुया नेवाः समुदायं याःगु व उगु कथं सहकार्य यानाः न्ह्याः वनेफइ धइगु धारणा तयादीगु खः।

भाषिक शुद्धताय् ध्यान बिइत, स्थलगत रुपं हे समाचारदाताया परिचालन प्रबन्ध यायेत व नेवाः समुदायया अप्वः ज्याखँ जुइगु स्वनिगःया नितिं बिस्कं हे स्ट्रिंगरया व्यवस्था यायेमाःगु वय्कःपिंसं सुझाव बियादिल।

बैठकय् रमेशकाजी स्थापित (गोरखापत्र दैनिक), नरेशवीर शाक्य (इलोहं प्रकाशन), सुरेश किरण मानन्धर, (भाषा आयोग सदस्य) नृपेन्द्र लाल श्रेष्ठ (लहना न्युज डटकम), सुरेश प्रसाद सायेजू (रेडियो जनसञ्चार), सुजीब बज्राचार्य (नेवाः अनलाइन न्युज), सुगत रत्न सिन्दुराकार (सम्यक वाःपौ), रत्नकाजी महर्जन (मेरो साप्ताहिक) सुरेन्द्रभक्त श्रेष्ठ (लहना साप्ताहिक), रामकृष्ण खड्गी (नेपाः टिभी) व दानदास श्रेष्ठ (स्वतन्त्र सञ्चारग्राम)या नं ब्वति दूगु खः।

राससया कार्यकारी अध्यक्ष धर्मेन्द्र झां नेपाल भाषा पत्रकारिताय् स्वानाच्वंपिं सञ्चारकःमितपाखें वःगु सुझाःतय्त फयाफक्व कःघानाः थ्व सेवायात वइगु इलय् थप परिमार्जन यायेत सहकार्य यानावने धकाः धयादिल। वय्कलं राससया मांभाय् बुखँ डेस्कया स्थायित्वया नितिं छगू कोष स्थापना यायेमाः धइगु अवधारणा रासस व्यवस्थापनया जूगु जानकारी बियादिसें थ्व अभियानया नितिं पैरवी यायेत नं इनाप यानादिल।

Categorized in राष्ट्रिय