आईसीसी मिसा टि–२० अन्तर्राष्ट्रिय क्रिकेट वरियताय् नेपाःया रुविना क्षेत्री व पूजा महतों छगू छगू थासय् सुधार याःगु दु।

अन्तर्राष्ट्रिय क्रिकेट परिषदं सार्वजनिक याःगु लिपांगु टि–२० वरियताय् रुबिना छगू थासय् सुधार जुयाः ९४ व पूजा छगू थासय् सुधार जुयाः ९६ गु थासय् थ्यंगु दु । अथे हे कप्तान इन्दु वर्मा छगू थासं कुहां वयाः ८१ गु थासय् दुसा सीता मगर ६९ गु थासय् कायम हे जुयाच्वंगु दु।

थ्व वरियताय् दकलय् च्वय् वेस्ट इन्डिजया हेली म्याथ्युज, निगूगु थासय् न्युजिल्यान्डया अमेलिया केर व स्वंगूगु थासय् भारतया दीप्ती शर्मा दु ।

टि–२० बलिङ धलखय् नेपाःया सुं नं कासामि शीर्ष १०० य् थ्यने मफुनि। थ्व वरियताय् पाकिस्तानया सादिया इकबाल शीर्ष थासय् दनिसा अष्ट्रेलियाया एनाबेल सदरल्याण्डं छगू थासय् सुधार यानाः निगूगु थासय् व भारतया दीप्ती शर्मा छगू थासय् कुहां वयाः स्वंगूगु थासय् लाःगु दु। टि–२० ब्याटिङ वरियताय् सीता राणा निगू थासय् कुहां वयाः १०० गु थासय् लाःगु दु।

थ्व वरियताय् अष्ट्रेलियाया बेथ मुनी व वेस्ट इन्डिजया हेली म्याथ्युज शीर्ष थासय् कायम दुसा भारतया स्मृति मन्धना छगू थासय् सुधार जुयाः स्वंगूगु थासय् लाःगु दु।

नेपाली मिसा पुचः टि–२० वरियताय् २१ गु थासय् कायम हे दु।

Categorized in कासा