इजिप्तया राजधानी कायरोय् च्वंगु नेपाली राजदूतावासया समन्वयय् अनया ओपेरा हाउसय् ‘फेसेस फ्रम नेपाल’ नामं स्वन्हूयंकं किपा ब्वज्या ग्वसाः ग्वःगु दु। इजिप्टया निंतिं नेपाली राजदूत सुशीलकुमार लम्सालं म्हिगः उलेज्या यानादीगु ब्वज्याय् इजिप्टया फोटो पत्रकार यासेर आला मुबारकं सन् २०२४ या शिलाच¥हे येँया पशुपति लागाय् कयातःगु ३० गु किपा दुथ्याकातःगु दु।

कायरोय् च्वंगु नेपाली दूतावासया कथं उगु इलय् राजदूत लम्सालं नेपाः व इजिप्ट दथुया निगू पक्षीय स्वापू क्वातुकेत जनस्तरया स्वापू महत्वपूर्ण जूगु धयादिल। वय्कलं विश्व सम्पदा धलखय् लाःगु पशुपतिइ देगः लागाया महत्वबारे धयादिसें किपा ब्वज्यां स्वकुमितय्त नेपाःया मौलिक नापं प्राचीन सांस्कृतिक सम्पदाया लू न्ह्यब्वःगु विचाः प्वंका दिल।

फोटो पत्रकार मुबारकं नेपालय् किपा कयागु इलया थःगु अनुभव न्यंकादिसें तःमिगु व विविधतां जाःगु सांस्कृतिक सम्पदां तःमि जूगु हुनिं नेपाः फोटोग्राफरतय् निंतिं तःधंगु आकर्षणया केन्द्र कथं जुयाच्वंगु धयादिल।

वय्कलं किपा ब्वज्या थेँ जाःगु गतिविधिं नेपाः इजिप्ट सांस्कृतिक कालबिल पाखें निगू देय् दथुया स्वापू अझं क्वातुनाः वनीगु भलसा प्वंकादिल।उलेज्या ज्याझ्वलय् फोटोग्राफरलिसें पत्रकार, कलाकार, कूटनीतिक नियोगया प्रतिनिधि, विद्यार्थीनापं थ्यंमथ्यं सच्छिम्हेस्यां ब्वति काःगु दूतावासं धाःगु दु। किपा ब्वज्या थ्व हे असार १९ गते तक सञ्चालन जुइ।

Categorized in अन्तर्राष्ट्रिय