सहरी विकास मन्त्रालयं येँया चोभाः गल्छीया ल्वहं तःछ्याइ मखु धकाः ध्वाथुइकूगु दु। मन्त्रालयं थौं छगू विज्ञप्ति पिकासें निकास विन्दु कथं दूगु गल्छीया ल्वहं तमछ्याइगु न्ह्यथँसें अन च्वंगु फोहोर धाःसा चीकेगु धाःगु खः।

मद्दिक वा वइबलय् चोभाः गल्छी लिक्क डुबान जुइगु समस्या वयाच्वनीगुलिं फोहोर व्यवस्थापन यायेत स्वयाच्वना धइगु मन्त्रालयया धापू खः। मन्त्रालयया प्रवक्ता नारायणप्रसाद मैनालीं ऐतिहासिक ल्वहंत चीकेगु छुं नं योजना मदूगु न्ह्यथनादिसें म्वाःमदुगु भ्रम च्वयेकेगु ज्या जूगु धयादिल।

“गल्छी लिक्क च्वंगु लागाय् न्हापा चुइकाः हयातःगु फोहोर चीकेगु, चलः वनीथें जाःगु सम्भावित थाय्त म्हसीकाः रोकथाम यायेगु व दीर्घकालीन समाधान यायेत आवश्यक प्राविधिक अध्ययनलिसें कार्ययोजना तयार यायेगु झीगु मू तातुना खः,” वय्कलं धयादिल, “मन्त्रालयं चोभाः गल्छी तब्याकेगु वा प्राकृतिक रूपं दूगु ऐतिहासिक ल्वहंत चीकेगु छुं नं योजना मदूगु ध्वाथुइकाः थजाःगु ज्याया भ्रम च्वयेकेगु धइगु पाय्छि मजू।”

मैनालीया कथं चोभाः गल्छी स्वनिगःया प्रमुख लःया निकास बिन्दु खः गन सहरय् दूगु दक्व खुसिं वइगु लः ल्वाकःज्याः वइगु व वाः वइगु इलय् लःया निकास पनीगु इलय् सहरया थी थी थासय् डुबान जुइगु जोखिम अप्वया वनाच्वंगु दु।वय्कलं थ्व लागाया दीर्घकालीन व्यवस्थापन यायेत सहरी विकास मन्त्रालयं थःगु तातुना ध्वाथुइकुसें धार्मिक, सांस्कृतिक नापं ऐतिहासिक महत्व दूगु चोभाः गल्छीया मौलिक स्वरूपयात बचे यानाः डुबान न्यूनीकरण यायेत फोहोरया व्यवस्थापन यायेगु धकाः धयादिल।

“प्राकृतिक सम्पदातय्गु संरक्षण यानाः मानव सुरक्षाय् बः बिइगु नीति कथं चोभाः लागाय् ज्या न्ह्याकेगु जुइ ”, विज्ञप्तिइ धयातःगु खः।थ्व हे असार १४ गते च्वंगु विपद् जोखिम न्यूनीकरण नापं व्यवस्थापन प्राधिकरण कार्यकारी समितिया ३२ क्वःगु बैठकं चोभाः गल्छीइ सम्भावित डुबान न्यूनीकरण यायेत नेपाली सेनालिसे समन्वयकय् आवश्यक पलाः न्ह्याकेत निर्देशन बिइधुंकाः सामाजिक सञ्जाल व थी थी राजनीतिक वृत्ततय्के थ्व विषययात कयाः थी थी धारणा सार्वजनिक जूगु धासें मन्त्रालयं असन्तुष्टि प्वंकूगु खः।

विपद् न्यूनीकरणलिसे सम्बन्धित निर्णयतय्के मनूतय् च्यूता अप्वया वनाच्वंगु इलय् मन्त्रालयया थ्व स्पष्टिकरणं विवादयात ज्यंकीगु अपेक्षा याःगु दु।

Categorized in राष्ट्रिय