बलिउड अभिनेत्री ज्याकलिन फर्नान्डिज विरुद्धया मनी लान्ड्रिङ प्रकरणय् ईडीया अनुसन्धान व कारवाही जारी जुइत्यंगु दु।

दिल्ली उच्च अदालतं आइतवाः ईडीया एफआईआर खारेज यायेत अभिनेत्रीया निवेदन खारेज याःगु दु। ईडीं जालसाज सुकेश चन्द्रशेखरलिसे सम्बन्धित २०० करोडया मनी लान्ड्रिङ मुद्दाय् एफआईआर दर्ता याःगु दु। ज्याकलिन नं थुगु मुद्दाय् अभियुक्त खः।तिहार जेलय् च्वनाच्वंगु इलय् सुकेशं रणब्याक्सीया पूर्व प्रमोटर शिविन्दर सिंह व मालविन्दर सिंहयात जेलं पितिनेगु बचं बियाः २०० करोड स्वयां अप्वः ध्यबा ठगी याःगु खः।

वय्कलं थःत गबलें प्रधानमन्त्री ज्याकुथिया अफिसर धकाः म्हसीका बियादीगु खःसा गबलें गृह मन्त्रालयया अफिसर धकाः म्हसीका बियादीगु खः। वयागु ठगीइ तिहार जेलया आपालं अधिकारीत नं दुथ्याःगु खः। सुकेशं इपिं फुक्कसितं तःधंगु रकम बीगु यानाच्वंगु खः।थ्वयां लिपा प्रवर्तन निर्देशनालयं सुकेशविरुद्ध मनी लान्ड्रिङ मुद्दा दर्ता याःगु खः।

सुकेशया कलाः लीना पाल नं थुगु मुद्दाय् अभियुक्त खः। वयात चेन्नईया छगू कम्पनी मार्फत ध्यबा छ्वयाहःगु द्वपं लाःगु दु।ईडीं दर्ता याःगु मनी लान्ड्रिङ मुद्दाय् चन्द्रशेखर व लीनायात दिल्ली प्रहरीं गिरफ्तार याःगु खः। प्रहरीं थ्व मुद्दाय् महाराष्ट्र संगठित अपराध नियन्त्रण ऐनया आह्वान याःगु दु।

Categorized in मनोरन्जन