प्रधानमन्त्री ओली स्वदेश लिहाझाल
लहनान्युज | दिल्लाथ्व नवमी ११४५, असार २० शुक्रवाः
प्रधानमन्त्री केपी शर्मा ओली स्पेनया सेभियाय् थ्व हे असार १६ निसें १९ गतेतक ग्वसाः ग्वःगु संयुुक्त राष्ट्रसङ्घीय ‘विकासया निंतिं वित्तसम्बन्धी प्यक्वःगु अन्तरराष्ट्रिय सम्मेलन’य् ब्वति कयाः थौं स्वदेश लिहाँझाःगु दु।
प्रधानमन्त्री ओलीयात त्रिभुवन अन्तरराष्ट्रिय विमानस्थलया अतिविशिष्ट कक्षय् उपप्रधानमन्त्री नापं सहरी विकासमन्त्री प्रकाशमान सिंह, संस्कृति, पर्यटन नापं नागरिक उड्डयनमन्त्री बद्रीप्रसाद पाण्डे व मुख्यसचिव एकनारायण अर्यालं लसकुस यानादिल। उगु झ्वलय् नेपाःया सेनाया छगू टुकडीं वय्कःया हनाय् गारत अर्पण याःगु खः। प्रधानमन्त्रीया लसकुस यायेत विमानस्थलय् उच्चपदस्थ सरकारी अधिकृत नापं सुरक्षा निकायया प्रमुख विमानस्थल वंगु खः।
‘इन्टरनेशनल कन्फरेन्स अन फाइनान्सिङ फर डेभलपमेन्ट अफ युनाइटेड नेसन्स् (एफएफडी–४)’ या निंतिं राष्ट्रसङ्घया महासचिव एन्टेनियो गुटेरस व स्पेनया प्रधानमन्त्री पेड्रो सान्चेजया मैत्रीपूर्ण ब्वनाय् वय्कः थ्व हे असार १४ गते अन झायादीगु खः। स्पेनय् झाया च्वंबलय् प्रधानमन्त्री ओलीं थी थी देय्या थः समकक्षी नापं राष्ट्रप्रमुखलिसे बिस्कंबिस्कं नापलानादिल।
उगु झ्वलय् प्रधानमन्त्री ओलीं स्पेनया नरेश फिलिप द्वितीय व समकक्षी सान्चेजलिसे नापलानादीगु परराष्ट्र मन्त्रालयं धाःगु दु।सम्मेलनया झ्वलय् प्रधानमन्त्री ओलीं सरकार प्रमुख, विश्व व क्षेत्रीय संस्था, वित्तीय व व्यापारिक संस्था, व्यवसायी, नागरिक समाज नापं राष्ट्रसङ्घीय निकायतय् प्रतिनिधिलिसे नं नापलानाः खँल्हाबल्हा यानादिल।परराष्ट्र मन्त्रालयया कथं सम्मेलनय् नेपालपाखें अल्पविकसित, चीधंगु व टापु देय्या विकासया हाथ्याबारे थःपिनिगु धारणा तःगु खः।
सम्मेलन दिगो विकासया निंतिं थत्थें व दीर्घकालीन लगानीया हाथ्यात पाः यायेगुलिइ केन्द्रित जूगु खः।प्रधानमन्त्री ओलीलिसें वय्कःया जहान राधिका शाक्य, प्रधानमन्त्रीया मुख्य सल्लाहकार विष्णुप्रसाद रिमाल, परराष्ट्र मन्त्रालयया सचिव अमृतबहादुर राई, अर्थ मन्त्रालयया सचिव घनश्याम उपाध्याय, प्रधानमन्त्री नापं मन्त्रिपरिषद् ज्याकुथिया सचिव राजकुुमार श्रेष्ठलिसें नेपाःया प्रतिनिधिमण्डलया दुजःपि नं थौं हे स्वदेश लिहाँझाःगु खः।
Categorized in राष्ट्रिय
