सार्वजनिक सेवा प्रसारण, नेपाल (पीएसबी, नेपाल) या कार्यकारी अध्यक्ष डा. महेन्द्र विष्टयात प्राज्ञिक अनुसन्धानकर्ता उपेश महर्जनं थःगु अनुसन्धान प्रतिवेदन लःल्हागु दु।

रेडियो नेपालपाखे प्रसारण जुइगु नेपाल भाषाया बुखँ व ज्याझ्वः जीवन दबु न नेवाः समुदायया पहिचान निर्माण यायेत म्हितूगु आयामबारे अनुसन्धानकर्ता महर्जनं अनुसन्धान यानादीगु खः। सिंहदरबारस्थित पिएसबी, नेपालया कार्यकारी अध्यक्ष डा. महेन्द्र विष्टं अनुसन्धान प्रतिवेदनया निष्कर्ष पत्रकारिताया ख्यलय् सरकारी सञ्चारगृहं आदिवासी जनजाति व भाषिक पहिचानय् ग्वहालि जुइ धका धयादीगु खः।

स्वतन्त्र अनुसन्धान मजुगु कारणं सरकारं याःगु बालागु ज्याझ्वः जनताया थाय् मथ्यःगुलि  सम्बद्ध पक्षया ध्यानाकर्षण यायेगु निति थज्यागु अनुसन्धानं ग्वहालि जुगु भलसा कयादीगु दु। रेडियो नेपालं नेपालभाषा (नेवारी)या बुखँ व ज्याझ्वःपाखे नेवाः समुदायया पहिचान निर्माण यायेत तधःगु भूमिका म्हितिइगु निष्कर्ष पिकागु दु।

सरकारया नीति नियम, ज्याझ्वः व सन्देश प्रत्यक्ष कथं सञ्चार जुया वयाच्वंगु अप्रत्यक्ष कथं नेवाः समुदायया पहिचानयात न स्थापितयासे हक अधिकार सम्बन्धी वकालत जुइगु अनुसन्धानय् उल्लेख याना तःगु दु।अथेहे, भाषा, कला, संस्कृति, सङ्गीतया ख्यलय् संरक्षण यायेगु नापं प्रवर्धनय् विशेष योगदान ब्यूगु सार्वजनिक जूगु खः।

पहिचान व अधिकारया विषय निजी नाप सामुदायिक रेडियो न जक सः ल्ह्वने फइ धइगु निष्कर्षय् नेपालया सन्दर्भय् ७५ दँनिसे रेडियो नेपालपाखे आंशिक अवसर व सुविधा जुया वयाच्वंगु खने दु। विश्वविद्यालय अनुदान आयोग व किपू स्थित मङ्गल बहुमुखी क्याम्पसया अनुसन्धान अनुदानय् पत्रकारिताय् क्रियाशिल अनुसन्धानकर्ता महर्जनं अनुसन्धान यानाच्वंगु खः।

मात्रात्मक व गुणात्मक मिश्रित अनुसन्धान विधि प्रयोग यासे वर्णनात्मक व विश्लेषणपाखे निष्कर्ष पिकाःगु धका वयकःया अनुसन्धान प्रतिवेदनय् उल्लेख यानातःगु दु।

Categorized in राष्ट्रिय