नेपालभाषा मंकाः खलः यलया ग्वसालय् यलय् दुने परापूर्वकालं निसें हुलाः वयाच्वंगु ख्वापाः पुयाः हुलिगु पौराणिक व ऐतिहासिक द्यः प्याखँ ब्वलंका तःगु द्यः खलः यात हनीगु ज्याझ्वः क्वचागु दु।

यलय्ं न्यागु ख्वाःपाः पुया हुलिगु द्यः प्याखँ जल प्याखँ (श्री हरसिद्धि प्याखँ), गथु प्याखँ (श्री नवदुर्गा प्याखँ), सिकाली प्याखँ (श्री रुद्रायणी प्याखँ), गं प्याखँ (श्री अष्टमातृका प्याखँ) व नृसिंह अवतार (श्री काति प्याखँ) यात हनेगु ज्या जुगु खः। ज्याझ्वलय् मू पाहाँ उपप्रधान व शहरी विकासमन्त्री प्रकाशमान सिंह पाखें म्हतिं म्हतिं पुचः यात झिद्वः तका ध्यबां नाप हना–पौ देछायेगु ज्या जुगु खः।

अथे हे ज्याझ्वःया मूपाहाँ प्रकाशमान सिंहं लुम्बिनी बौद्ध विश्वविद्यालयया डीन माणिकरत्न शाक्यं च्वयादीगु “ललितपुरका प्रसिद्ध मुकुण्ड नाचहरु ” नां या सफू चिखिफ्यनेगु ज्या यानादीगु खः । मन्त्री सिंहं थुगु सफुतिइ यलया परम्परागत नृत्य बिषय् स अमूर्त सम्पदाया गहन अनुसन्धान न्ह्यब्वःगु लिं नेपाःया साँस्कृतिक सन्दः दुने न्हूगु जः लूगु खँ कनांदिल। वयेकःलं थुकिं नेपाःया साँस्कृतिक विशिष्टतायात अन्तर्राष्ट्रिय मञ्चय् प्रवर्धन यायेत ग्वाहालि जुइगु विश्वास प्वंकादिल।

अथे हे ’नेपालभाषा मंकाः खलः, यल’ व ’मिसा साहित्यिक मुना’ मिसा साहित्यिक संस्थाया मंकाः कुतलय् नेपालभाषाया “सत्यया लँपु” नांया चिनाखँ मुनाः सफू नं पितब्वज्या जूगु खः।उगु ज्याझ्वलय् यल महानगरपालिकाया मेयर चिरिबाबु महर्जन, नेवाः दे दबूया केन्द्रिय नायः पबित्र बज्राचार्य, च्वमि डीन माणिक रत्न शाक्य, मिसा साहित्यिक मुनाया नायः विमलप्रभा बज्राचार्यपिन्स न नुगँ खः तयादीगु खः।

Categorized in राष्ट्रिय