दँय् दसं छम्ह सर्जकयात लःल्हाना वयाच्वंगु ‘भोजपुर प्रतिभा पुरस्कार’ पाखें टक्सारय् च्वंम्ह प्रेम शाक्ययात हंगु दु।

त्रिवेणी साहित्य प्रतिष्ठान भोजपुरं शाक्ययात शनिबाः छगू ज्याझ्वःया दथुइ सिरपालिसें हंगु खः। विसं २०४५ निसें वाद्यवादकया कथं मदिक्कं क्रियाशील शाक्यं खास यानाः नेवाः दथुइ लोकंह्वाःगु खीं, धाः, धिमे, नाय्खीं लिसें हारमोनियम, तमल थें जाःगु बाजं प्रशिक्षकया कथं नेवाः कला व तजिलजिया म्हालासाला व संवद्र्धनय् योगदान यानाः वयाच्वनादीम्ह वय्कःयात सिरपा लःल्हानाःगु धकाः ‘पुरस्कार कोष’या संरक्षक अमृका ताम्राकारं धयादिगु दु।

प्रतिष्ठानया संस्थापक नायः श्याम तमोटं शाक्ययात हनापौ लिसें नीनिद्वः निसः व नीनितका दांया सिरपा लःल्हानादिगु खः। शाक्यं नेवाः बाजं थायेगु सीप लःल्हायेगु निंतिं स्थानीय स्तरय् नियमित व थी थी जिल्लाय् नापं प्रशिक्षण बियाः च्वनादीगु दु।

विसं २०१७ सालय् जन्मय् जुयादीम्ह शाक्य भोजपुर नगरपालिका–१२ टक्सारयाम्ह खः। प्रतिष्ठानं ‘भोजपुर प्रतिभा पुरस्कार’ दँय् दसं साहित्य, कला व संगीतया ख्यलय् योगदान बियादीपिंत बिया वयाच्वंगु दु।

Categorized in राष्ट्रिय