प्रधानमन्त्री केपी शर्मा ओलीं स्पेनया सेभियाय् क्वचाःगु संयुक्त राष्ट्रसङ्घया ‘विकासया निंतिं वित्त’ विषयया प्यक्वःगु अन्तरराष्ट्रिय सम्मेलनय् नेपाःया ब्वति व उपलब्धिबारे संसदयात जानकारी बियादीगु दु।

प्रतिनिधिसभाया थौंया बैठकय् ई कयाः प्रधानमन्त्री ओलीं उगु सम्मेलनं आर्थिक कूटनीतिया निंतिं विश्वस्तरय् न्हूगु साझेदारी वृद्धि यानाः दिगो विकास आज्जुइ थ्यंकेत गति बिइत योगदान ब्यूगु धयादिल। प्रधानमन्त्री ओलीं उगु सम्मेलन न्ह्यः थ्व हे असार १४ गते प्रतिनिधिसभाया बैठकय् सम्मेलन व भ्रमणया ज्या धलःबारे जानकारी बियादीगु खः।

सम्मेलनया निंतिं प्रधानमन्त्री ओली थ्व हे असार १४ गते उखेपाखे झायाः असार २० गते स्वदेश लिहाँझाःगु खः। सम्मेलनय् प्रधानमन्त्री ओलीं तसकं म्ह्वः विकसित मुलुकपाखें न्ह्यलुवा जुयाः संबोधन यायेगु झ्वलय् थ्व मुलुकया न्यायपूर्ण नापं आर्थिक सामाजिक विकासया पक्षय् वकालत याना धकाः जानकारी बियादिल।

सेभिया प्रतिबद्धताया कार्यान्वयनं उगु मुलुकं थःगु स्तरोन्नतिया निंतिं विश्वस्तरया साथ व ग्वाहालि दइगु अपेक्षा यानाः प्रधानमन्त्री ओलीं नेपाः सन् २०२६ तक विकासशील मुलुकय् स्तरोन्नति जुइ त्यंगु खँ धयादिल। सम्मेलनया झ्वलय् तसकं म्ह्वः विकसित देय्तय्गु पुचःया बैठकयात अध्यक्षतालिसें संबोधन, थी थी साइलाइड खँल्हाबल्हा व गोलमेच सम्मेलनय् थःगु नेतृत्व, वकालत प्रतिबद्धताबारे सदनयात प्रधानमन्त्री ओलीं जानकारी बियादिल।४४ गू तसकं म्ह्वः विकसित मुलुकत दूगुलिइ नेपालं उगु सम्मेलनया झ्वलय् उगु मुलुकतय् न्ह्यःने प्रभावकारी नेतृत्व यायेफइ धइगु क्यना धकाः वय्कलं ध्वाथुइकादिल।

सम्मेलनया छन्हु न्ह्यः प्रधानमन्त्री ओलीं नागरिक समाजया भेलायात संबोधन यानाः सशक्त नागरिक समाजया खबरदारीपूर्ण भूमिकाया निंतिं आह्वान यानादीगु खः। नेपालं नागरिक समाजया निंतिं लोकतान्त्रिक व उदार व्यवस्था याःगु नं प्रधानमन्त्री ओलीया धापू दु।

सम्मेलनया झ्वलय् प्रधानमन्त्री ओली व स्पेनया प्रधानमन्त्री (स्पेन सरकारया अध्यक्ष) पोद्रो साञ्चेज दथुइ निगू पक्षीय खँल्हाबल्हा जूगु खः।

Categorized in राष्ट्रिय