राष्ट्रपति रामचन्द्र पौडेलं राजनीतिक स्थायित्वपाखें सुशासन, सामाजिक न्याय व समृद्धिया जनआकांक्षायात पूवंकेगु हे मंकाः दायित्व जूगु धयादीगु दु।

मानवअधिकार नापं शान्ति समाजं थौं ग्वसाः ग्वंगु कर्मयोगी बद्री पहाडी समाजसेवा पुरस्कार २०८१ लःल्हायेगु समारोहयात संबोधन यानादिसें वय्कलं सुशासनया हःपाःलिसें शान्ति, न्याय व स्वतन्त्रताया अनुभूति आम नागरिकतय्त याकेमाःगु जरूरी जूगु धयादिल।

राष्ट्रपति पौडेलं झीसं ययेकूगु लोकतान्त्रिक शासन प्रणालीयात जीवन पद्धति कथं नालाः लोकतान्त्रिक संस्कृतियात बल्लाकाः थुकिया हा अझ ताःहाकः यायेगु थौंया आवश्यकता जूगु धयादिल। वय्कलं सामाजिक न्यायया निंतिं मानव अधिकार नापं शान्ति समाजया अभियान व योगदान महत्त्वपूर्ण जूगु धयादिसें नेपालय् लोकतान्त्रिक गणतन्त्र स्थापना यायेत व शान्ति प्रक्रियाय् समाजं म्हितूगु भूमिकायात च्वछानादिल।

उगु ज्याझ्वलय् शान्ति समाजं बियावया च्वंगु कर्मयोगी बद्री पहाडी समाजसेवा पुरस्कार २०८१ पाखें सामाजिक न्यायया अभियानकःमि नापं पूर्व राजदूत पदम सुन्दासयात पुरस्कृत याःगु खः। ज्याझ्वलय् शान्ति समाजया संस्थापक सभापति कृष्ण पहाडी, सभापति रेनुका पौडेललिसेंतय्सं समाजया ज्याखँया बारे जः ह्वलादिल।

Categorized in राष्ट्रिय