प्रधानमन्त्री केपी शर्मा ओलीं थी थी अन्तरराष्ट्रिय धेंधेंबल्लाय् पदक त्याकूपिं कासामि व स्वापू दुपिं प्रशिक्षक लिसें व्यवस्थापकपिंत थौं सिरपाः लःल्हानादिसें हनादीगु दु।

प्रधानमन्त्री निवास, बालुवाटारय् युवा लिसें खेलकुद मन्त्रालयपाखें ग्वसाः ग्वःगु ज्याझ्वलय् वंगु कात्तिक ७ निसें १२ गतेतक जापान उसु ताइजी महासङ्घया ग्वसालय् जापानय् जूगु स्वक्वःगु थाउलो वल्ड कपय् कास्य पदक त्याकूम्ह विजय सिँजालीयात प्रधानमन्त्री ओलीं खुइन्यागू लख दां सिरपाः लिसें दसिपौ लःल्हानादिल।

अथे हे, वंगु फागुन २० निसें २५ गते तक इरानय् जूगु खुक्वःगु एसियन कबड्डी च्याम्पियन (मिसा) पाखे कास्य पदक त्याकूम्ह मनमती विष्टलिसेंयात म्हतिं छगू लख न्यय्द्वः तकाया ल्याखं सिरपाः लःल्हानादिल। वहे ज्याझ्वलय् असोज २० निसें २६ गते तक श्रीलङ्का भलिबल सङ्घया ग्वसालय् श्रीलङ्काय् जूगु ‘काभा यु–२०’ मिजं भलिबल च्याम्पियनसिपय् रजत पदक त्याकुम्ह अर्जुन नेपालीलिसेंयात स्वंगू लख तकाया ल्याखं सिरपाः लःल्हानादीगु दु।

वय्कःपिंत राष्ट्रिय खेलकुद विकास नियमावली, २०७९ या व्यवस्था कथं थ्वहे असार ९ गतेया मन्त्रिपरिषदया बैठकया निर्णयकथं दां सिरपाः लिसें हंगु खः। नापं, थ्वहे असार ८ निसें २१ गते तक मलेसियाय् जूगु ‘एसिसी यु–१६ इस्ट जोन कप’ क्रिकेट धेंधेंबललाय् सिङ्गापुरयात बुकाः उपाधि त्याकेत ताःलाम्ह विपिनप्रसाद शर्मालिसेंया पुचःयात प्रधानमन्त्री ओलीं लसहनादिसें लसकुस यानादीगु दु।

ज्याझ्वलय् प्रधानमन्त्री ओलीं कासा ख्यःया विकासया निंतिं उच्च प्राथमिकता बियाः वयाच्वनागु धयादिसें मं तयाः व्यावसायिक ल्याखं समर्पण भावं कासाख्यलय् न्ह्यायेफुसा ताःलाके फइगु विश्वास प्वंकादिल । “झीसं सङ्गठित कथं कासाख्यःयात न्ह्याकागु यक्व मदुनि।

आः सरकारं कासाख्यःया विकासया निंतिं माक्वं ध्यान बियाच्वनागुलिं आः कासामिं व्यावसायिक कथं न्ह्याः वनेफयाच्वंगु दु”, प्रधानमन्त्री ओलीं धयादिल, “जि देय्या म्हसिका व प्रतिष्ठायात थकायेत योगदान ब्यूपिं कासामि, शिक्षकलिसेंयात यक्व यक्व सुभाय् नापं भिंतुना देछाना च्वना।” युवा लिसें खेलकुदमन्त्री तेजुलाल चौधरीं सरकारं आः वइगु आर्थिक दँया निंतिं थुगुसी सिबें थ्यंमथ्यं निदुगं बजेट विनियोजन यानागु व किपुली निर्माण जुयाच्वंगु क्रिकेट ख्यःया ज्या थ्यं मथ्यं लिपांगु चरणय् थ्यंलिसें देय्या कासाख्यः तसकं उत्साहित जूगु धयादिल।

Categorized in कासा