प्रधानमन्त्री केपी शर्मा ओलीं गुरु पुन्हिया भिंतुना प्वंकादिसें सकसिगु दुनुगलय् थ्यंक जः न्यना वनेमा धकाः मनंतुनादीगु दु। सामाजिक सञ्जालपाखें भिंतुना देछानादिसें वय्कलं झीत मेपिंके न्ह्यसः न्यनेगु मखु, थःगु सत्यय् जः ह्वलीगु ‘मत’ माःगु व थुजाःगु मत विवेक जूगु धयादीगु दु।

गुरु पुन्हियात महर्षि व्यास जयन्तीया कथं नं कायेगु यानाच्वंगु धयादिसें प्रधानमन्त्री ओलीं धयादिल, “झीगु प्राचीन पूर्वीय सभ्यतां थःगु दुनुगलय्या अस्तित्व म्हसिकेत लँपु क्यनीम्हेसित गुरु धयातःगु दु व हलिंया बारे ज्ञां बिइम्हेसित शिक्षक धाइ।”

फेसबुकय् प्रधानमन्त्रीं च्वयादीगु दु, “गुरु खिउँ थासं यचु थाय् यंकाबीम्ह व थःगु नैसर्गिक स्वभाव म्हसीकाबीम्ह पूज्य पात्र खः। गुरु पुन्हिया पवित्र दिं झी सकसिगु नं दुनुगलय् थ्यंक जः न्यना वनेमा। सकसितं भिंतुना।”

Categorized in राष्ट्रिय