प्रधानमन्त्री केपी शर्मा ओलीं नेपाल प्रिमियर लिग (एनपीएल) क्रिकेट राष्ट्रिय गौरवया विषय जूगुलिं दिकेमज्यूगु धका धयादीगु दु।

बिहीवाः सातदोबाटोय् जूगु उच्च प्रदर्शन केन्द्रया उलेज्या ज्याझ्वलय् नायः ओलीं उगु खँ धयादीगु खः।‘आः भव्यतापूर्वक एनपीएलया तयारी याये। एनपिएल झीगु राष्ट्रिय गौरव खः। राष्ट्रिय स्तरय् थुकियात अझ अप्वः बः बीमाः, आकर्षण अप्वयेकेमाः,’ वय्कलं धयादी, ‘एनपीएल गौरवया विषय खः, म्हितेमाः।

एनपीएलयात न्ह्यःने यंकेगु निंतिं सकसितं ध्यान बीत इनाप यानाच्वना।’ वय्कलं सरकारय् वयेधुंकाः राजनीति मखु, ज्या यायेमाःगु खँय् नं बः बियादिल। ‘सरकारय् राजनीतिक दल जक वइ। राजनीतिक पार्टीतय्सं सरकारय् वयेवं राजनीति याइमखु। सरकारय् वये धुंकाः ज्या दुथाय् ज्या याइ,’ वय्कलं धयादी, ‘कासा विकास यायेगु खःसा कासायात न्ह्यःने यंकेमाः। झीसं अन राजनीति याये मज्यू। राजनीति स्वयां नं कासाय् ध्यान बीमाः।

’वय्कलं युवा व खेलकुद मन्त्री तेजुलाल चौधरीयात लक्षित यानाः उगु खँ धयादीगु खः। थौंकन्हय् मन्त्री चौधरीं गठन याःगु कार्यदलं एनपीएलय् खनेदूगु विवादया अनुसन्धान यानाच्वंगु दु। थ्व हे झ्वलय् राष्ट्रिय फुटबल लिगया लेटर हेड छ्यःगु व थुकिया नितिं फरक कार्यदल गठन याःगु विवाद नं पिहां वःगु खः।

अथे हे प्रधानमन्त्री ओलीं आः किपूलि दयेका च्वंगु रंगशाला चीधंगु आकारया चिन्ता मयायेत इनाप यानादीगु दु । ‘कम्ती नं ५० हजार दर्शक च्वनेफइगु रंगशाला स्वयां चीधंगु छुं नं रंगशाला जुइमखु । किपूलि दयेकाच्वंगुलिं जक चीधं जुइ धकाः बिचाः यायेमते, मेगु चरणय् अझ तःधं जुइक विस्तार यायेगु जुइ’ वय्कलं धयादीगु दु।

Categorized in कासा