प्रधानमन्त्री केपी शर्मा ओलीं बिहीवाः यलया सातदोवाटोय् च्वंगु अन्तर्राष्ट्रिय खेलकुद परिसरय् राष्ट्रिय खेलकुद परिषदं दयेकूगु ‘राष्ट्रिय उच्च प्रदर्शन केन्द्र’या उलेज्या यानादीगु दु।

राखेपां कासामिपिनिगु नियमित प्रशिक्षणया नितिं सुसज्जित प्रशिक्षण मैदानया रुपय् राष्ट्रिय उच्च प्रदर्शन केन्द्र पलिस्था याःगु दु। छगू इलय् १०० म्ह स्वयां अप्वः कासामिपिन्सं केन्द्रय् अभ्यास यायेफइ । केन्द्रय् खेलकुद क्षेत्रयात माःगु अत्याधुनिक प्रविधि दुगु ३१ गू उपकरणत दु।

अमेरिका, बेलायत, जर्मनी, दक्षिण कोरिया लिसेंया देसं उगु उपकरण हःगु दु। उगु उपकरणय् एक्स–बडी मेसिन, फोर्स फ्रेम, फोर्स डेस्क, एसभीटी मेसिन, ईएमजी उपकरण, ल्याक्टिक एसिड एनालाइजर, बीएफआर उपकरण, डायनामो उपकरण, ह्युमन ट्रयाक उपकरण, भिओ २ म्याक्स उपकरण, टाइमिंग गेट उपकरण आदि दुथ्याः।

थुगु उपकरणं कासामितय्के खनेदूगु समस्या व कमजोरी पहिचान यायेत ग्वाहालि जुइगु विश्वास एनएससीं याःगु दु। उलेज्याझ्वलय् युवा लिसे खेलकुद मन्त्री तेजुलाल चौधरी, एनएससी उपाध्यक्ष ध्रुव आचार्य, सदस्य सचिव टंकलाल घिसिङ, आदि उपस्थित दुगु खः।

Categorized in कासा