किपू नगरपालिका वडा ल्याः ६ या वडा नायः खिरमान सिंह बस्नेत पृथ्वीयात च्वबाहाःया न्हसिकाप गल्छीया विषययात कया बियातःगु सिफारिस रद्द यायेत माग यानाः किपुलिइ क्रियाशिल जातीय संस्थानिसें नेवाः देय् दबू व अभियन्तापिं नापं न्हय् गुम्हेस्यां ल्हाःचिं तया निवेदन बिउगु दु।

असार २६ गते विहिवाः वडा ज्याकू क्वयनाय् वना हे उगु निवेदन वडा नायः बस्नेतयात लःल्हाःगु खः।किपू नगरपालिका वडा ल्याः ६ पाखें हे २०८१ साल फागुन २० गते बिउगु सिफारिसया आधार कया हे न्हसिकापया गल्छीयात लिच्वः लाकेगु कथं निर्णय याना पहल याःगुलिं तच्वकं विवादय् वःगु खः।

उगु विवादयात ज्यंकेत नापं न्हसिकापया मौलिकतायात ल्यंकेत, न्हसिकापया धार्मिक, सांस्कृति, ऐतिहासिकता नापं प्राकृतिक सम्पदायात तकं ल्यंकेगु नितिं सिफारिस रद्द यायेमाःगु माग यानातःगु दु।उगु सिफारिस रद्द याना रद्द जूगु व्यहोरा सम्विन्धित पक्षयात लिखित रुपं जानकारी बिइत माग यानातःगु दु। वडा नायः खिरमान सिंह बस्नेत पृथ्वीं समुदायपाखें वःगु निवेदनयात वडा समितिया मुँज्याय् तया किपू नापं नेवाः व सकल स्वनिगःवासीया भावना कथं माःगु कथंया निर्णय याना न्ह्याः वनेगु बचं बियादिल।

उगु निवेदनय् देय् दबू किपू नगर समितिया संयोजनय् बिइगु ज्या जूगु खः। देय् दबू किपू नगरया नायः बुद्धिलाल ज्यापु, ज्यापु महागुथि किपू नगरया नायः रामभोला महर्जन, मानन्धर समुदायया प्रतिनिधि धर्मरत्न मानन्धर, किपू स्यस्यः समाजया प्रचण्डमान प्रधान, नापित समाजया नविन नापित, ग्वाः समाजया प्रेम कृष्ण गोपाली, माली समाजया पूर्ण मालकार, नकःमि समाजया महेश चन्द्र नकःमि, कपाली समाजया न्हुच्छे दर्शनधारी, देय् दबू स्वनिगः विशेष प्रदेश समितिया निर्वतमान नायः नापं पत्रकार श्रीकृष्ण महर्जन नापं न्हय् गुम्हेस्यां ल्हाःचिं तयातःगु दु।

Categorized in राष्ट्रिय