नेपाल राष्ट्र बैंकं आः वइगु आर्थिक दँ २०८२÷८३ या निंतिं मौद्रिक नीति सार्वजनिक याःगु दु।

मौद्रिक नीति सार्वजनिक यानादिसें राष्ट्र बैंकया गभर्नर डा विश्वनाथ पौडेलं सावधानी कथं यातुसे च्वंगु नीति नालाकायागु धयादिल। निक्वःगु वित्तीय ख्यः रणनीतिक स्वीकृत यानाः कार्यान्वयनय् हयेगु मौद्रिक नीतिइ न्ह्यथना तःगु दु।

ब्याजदर करिडोरया च्वयेया सीमाया कथं जुया च्वंगु बैंकदरयात ६ प्रतिशत व नीतिगत दरयात ४.५ प्रतिशत याःगु दु। थ्वसिबें न्ह्यः बैंकदर ६.५ प्रतिशत व नीतिगत दर ५ प्रतिशत जुया च्वंगु खः। मौद्रिक नीतिपाखें नीजि आवासीय छेँ निर्माण लिसें न्यायेगु निंतिं बिइगु त्यासाया सीमा निगू क्वतिं अप्वयेकाः स्वंगू करौड याःगु दु। न्हापा छेँ दयेकेत बाय् न्यायेत त्यासा–मू अनुपात ८० प्रतिशत तक व मेमेगु निंतिं ७० प्रतिशत तक याये फइगु व्यवस्था यानातःगु खः।

व्यक्तिगत पाखे शेयर धितो त्यासाया सीमा झिंन्यागू क्वतिं अप्वयेकाः नीन्यागू करौड थ्यंकूगु दु। विदेश भ्रमणय् वनीपिं नेपाःमिं ज्वनाः वने फइगु ध्यबाया सीमा नीन्यासः अमेरिकी डलरं अप्वयेकाः स्वद्वः अमेरिकी डलर याःगु दु। आः वइगु अर्थिक दँय् नीजि ख्यपाखे पिहाँ वनीगु त्यासा १२ प्रतिशतं अप्वोगु आज्जु मौद्रिक नीतिं क्वःछ्यूगु दु।

Categorized in राष्ट्रिय