सङ्घीय राजधानीया प्रमुख पर्यटकीय गन्तव्य ठमेलय् ‘पर्यटन सूचं केन्द्र’ नीस्वंगु दु। बागमती प्रदेशया संस्कृति नापं पर्यटन मन्त्रालयं येँ महानगरपालिका–२६ या ग्वाहालि व ठमेल पर्यटन विकास परिषदया सहकार्यय् ‘पर्यटन सुचं केन्द्र’ नीस्वंगु खः।

उगु केन्द्रया थौं बागमती प्रदेशया संस्कृति नापं पर्यटनमन्त्री बिमल ठकुरीं शुभारम्भ यानादिल। ज्याझ्वलय् मन्त्री ठकुरीं सुचं केन्द्रं ठमेल जक मखु नेपाःया हे पर्यटन विकासय् ग्वहालि जुइगु भलसा प्वंकादिल। वय्कलं बागमती प्रदेशं चितवनलिपा ठमेलय् पर्यटन सुचं केन्द्र नीस्वंगु जानकारी बियादिसें उगु केन्द्रपाखें पर्यटकतय्सं नेपाःया पर्यटकीय ज्याखँया बारे खँ सिइकी धकाः धयादिल।

ठमेलय् सार्वजनिक खिखांमुगः नं निर्माण यायेगु धकाः वय्कलं धयादिल।येँ महानगरपालिका–२६ या वडानायः ख्यामराज तिवारीं नेपाः भ्रमणय् वइपिं विदेशी पर्यटक मध्ये ८० प्रतिशत पर्यटक ठमेल चाःह्यू वइगु जूगुलिं इमित सुचं केन्द्रपाखें ग्वाहालि जुइगु भलसा प्वंकादिल। बागमती प्रदेश संस्कृति नापं पर्यटन मन्त्रालयया सचिव दीपेन्द्र सुवेदीं प्रदेश सरकारं प्रदेशदुनेया फुक्क जिल्लाया पर्यटकीय गन्तव्ययात कःघानाः ‘ट्राभल बुक’ पिकायेत्यंगु जानकारी बियादिल।

वय्कलं पर्यटन सुचं केन्द्रयात प्रविधिलिसे स्वाकाः न्ह्याकेत प्रदेश सरकार जुयाच्वंगु दु धकाः धयादिल।

Categorized in राष्ट्रिय