यलया ऐतिहासिक नृसिंह जात्राया प्रारम्भिक विधि कथं स्वां तयाः मल्ल जुजुयात प्रतिकात्मक रुपं ब्वनेगु ज्या क्वचाःगु दु।

दँय् दसं स्वां तःवनेगु धकाः नृसिंह जात्रा यायेगु भाला बियातःपिं राजोपाध्यायय् छेँजःपिनि न्हय्पलाखय् गुरु पुन्हि कुन्हु यलया मल्ल जुजुयात स्वां, जनै, ग्वय्लिसेंया ज्वलंत तयाः प्रतीकात्मक रुपं ब्वनेगु याना वयाच्वंगु खः। दँय् दसं भाद्र कृष्ण पञ्चमी कुन्हु नृसिंह जात्रा न्ह्याकेगु याना वयाच्वंगु खः धाःसा थुगुसी साउन २९ गते थ्व जात्रा न्यायेकेत्यंगु दु।

थुगुसी जात्रा ग्वसाः ग्वयेगु भाला गाःबहाःया मधुर शर्मा राजोपाध्यायया छेँजःपिनिगु खः। थुगुसी जात्रा न्यायेकेत वंगु बिहिबाः गुरु पुन्हिकुन्हु थ्व ज्या क्वचायेकूगु खः। वि.सं. १७४१ य् जुजु जुयादीम्ह योगनरेन्द्र मल्लयात थौंतक नं जीवित जुजु –म्वाना च्वंम्ह जुजु) कथं कयातःगु दु। दरवारया च्वय् च्वंगु तलाया पश्चिमपाखे छगू क्वथाया झ्याः चायेकाः वय्कःया निंतिं छगू धं यनेगु धकाः आःतक नं तयार याना च्वंगु दु।

२०४६ सालतक वय्कःया निंतिं धकाः न्हिया न्हिथं सुथसिया इलय् बजां यंकेगु यानाच्वंगु खः।दरवारया न्ह्यःने च्वंगु जुजु योगनरेन्द्र मल्लया झ्वाताया द्यःने चखुंचा छम्ह नं दु, वय्कलं थः सी न्ह्यः व चखुंचा ब्वयाः मवंतले थः म्वाना च्वंगु दइ धकाः थुइकि धयादीगुलिं आः तक नं जुजु योगनरेन्द्र म्वानाः हे च्वंगु दनि धकाः विश्वास याइ, थ्व हे विश्वासय् ऐतिहासिक नृसिंह जात्राया न्हापांगु विधि कथं मल्ल जुजुयात यल दरवारया तुसाहिटीइ च्वंगु शिलाया शैय्या अथे धइगु खाताय् ब्वनाकथं स्वां तयेगु याइ। थौंकन्हय् गुठी संस्थान, यलया प्रमुखया उपस्थितिइ स्वां तयेगु याइ।

मल्ल जुजुयात ब्वने धुंकाः जक राष्ट्रपति, गुथिया थकालिलिसें सकसितं जात्राय् ब्वति कायेत ब्वनी। बिहिबाः हे जात्रानाप स्वापू दुपिं गुथियारत शितल निवास थ्यंकाः राष्ट्रपति रामचन्द्र पौडेलयात नं साउन २९ गते जुइगु जात्रा अवलोकनया निंतिं ब्वनादीगु खः। यलया राजोपाध्याय पुचलं थकालिनिसेंया लिधंसाय् छसिंलाक जात्रा ग्वसाःग्वयेगु भाला कयाः नृसिंह जात्रा न्ह्याका वयाच्वंगु खः।

थ्व जात्रा ने.सं. ७५१, अथे धइगु वि.सं. १६८८ निसें मद्दिक न्ह्याना वयाच्वंगु लिखित दस्तावेजय् च्वयातःगु दु।

Categorized in राष्ट्रिय